Атырауда 562 отбасы 75 млн теңгенің атаулы әлеуметтік көмегін алған

АТЫРАУ. KAZINFORM – Атырау облысында 1 наурызға дейін 562 отбасына 75 млн теңгенің атаулы әлеуметтік көмегі берілген. Бұл отбасыларда 3 356 адам бар. 

Атырау облыстық жұмыспен қамтуды үйлестіру және әлеуметтік бағдарламалар басқармасының баспасөз қызметінен мәлім еткендей, былтырғы көрсеткішпен салыстырғанда, биыл шартты ақшалай көмек алушылар саны азайған.

«Атаулы әлеуметтік көмек 403 отбасындағы 2 574 адамға шартты ақшалай, 159 отбасындағы 782 адамға шартсыз ақшалай күйінде тағайындалды. Мұндай көмекті алушыларға жасалған талдауға сәйкес, 18 жасқа дейінгі жасөспірімдердің үлесі 69 пайызды құрады. Ал, жұмыссыздар – 2,7, басқа санаттағылар – 28,3 пайыз. Жұмысы барлар – 10,3, зейнеткерлер – 0,5, мүгедектер – 0,7, студенттер – 4,1 пайыз. Бала күтіміндегі отырғандар 11,6, басқалары –1,1 пайызды құрып отыр», - деп хабарлады басқарманың баспасөз қызметі. 

Шартты ақшалай көмек алған 403 отбасындағы 92 жұмыссыздың 79 пайызы жұмыспен қамту шараларына тартылған. Оның ішінде 8-і тұрақты, 60-ы қоғамдық, 5-уі әлеуметтік жұмысқа жіберілген.

«Өңірде атаулы әлеуметтік алушылар өз ісін ашуға қайтарымсыз грант, ал, жастар 2,5 пайыз жеңілдікпен микрокредит иеленуге, қайта даярлау курстарынан өтуге үміткер бола алады. Ал, 488 отбасындағы 1-ден 6 жасқа дейінгі 943 балаға 9,9 млн.теңгеге қосымша төлем берілді», -деп мәлім етті басқарманың баспасөз қызметі.

Еске сала кетелік, бұған дейін Атырауда апатты үйлерде тұратын 24 отбасыға жаңа баспана берілгенін жазған болатынбыз.