Атырауда 6 жыл бұрын басталған қалашық құрылысы әлі бітпеді
АТЫРАУ. KAZINFORM — Атырау қаласының Талғайраң елді мекенінде 2019 жылы 24 тұрғын үйдің құрылысы басталған еді. Осы кезге дейін 8 үйдің ғана құрылысы аяқталған.
Атырау облысы әкімінің баспасөз хатшысы Руслан Жұмағазиевтің ұсынған ақпаратына қарағанда, Атырау қаласының бас жоспарына сәйкес, көпқабатты тұрғын үй салу үшін Талғайраң елді мекенінен 62 гектар жер телімі бөлінген.
— Талғайраң тұрғын үйлер құрылысының егжей-тегжейлі жоспары жасақталды. Соған сәйкес 70 тұрғын үй салу жоспарланған еді. Оның ішінде 1 080 пәтерлік 24 тұрғын үйдің құрылысы басталды. Бұл үйлердің аумағы — 56 мың 323 шаршы метр. Қазір бұл үйлердің құрылысы толық аяқталды. Оны инженерлік-коммуникациялық желі құрылысы аяқталған соң қолданысқа беру жоспарланып отыр, — деп хабарлады Руслан Жұмағазиев.
Оның мәліметінше, Спутник қалашығы аталған аумақта магистралды электр желісі бар 110/10 кВ қосалқы станция құрылысы аяқталған.
Алаңнан тыс электр желісі тартылған. Қазір 24 тұрғын үйге алаңішілік электр желісін тартудың 90 пайызы атқарылған.
— Жаңа шағынауданда магистралды газ құбырының құрылысы АГРС қондырғысымен қоса жүріп жатыр. Осы кезге дейін газ жеткізу құбырының, алаңнан тыс газ желісін электрмен қамту жұмысы аяқталып тұр. Құрылысы аяқталған 24 тұрғын үйді газбен қамтитын желінің салынып бітті, — деп мәлім етті облыс әкімінің баспасөз хатшысы.
Мұнда ұзындығы 9,3 шақырым магистралды су құбыры тартылып жатыр. Су құбырының дайындығы — 95 пайыз.
— Қазір су және кәріз құбырын жеткізу нысанының құрылысы аяқталды. Енді ұзындығы 22 шақырым магистралды кәріз желісі салына бастады. Қайыршақты ауылдық округіне қарасты ауылдар аталған кәріз желісіне қосылуына байланысты жобалау-сметалық құжаттамаға түзету енгізіліп жатыр. Осы айда жобаға мемлекеттік сараптаманың қорытындысы алынады, — дейді ол.
Алайда жаңа шағынауданда жылу желісін жүргізу әлі толық аяқталмаған.
Мәселен, қуаты сағатына 99 гкал құрайтын қазандықтың құрылысына байланысты жобалау-сметалық құжаттамасы жасақталып, сараптамаға жіберілген.
Жылу жеткізу желісі құрылысының 25 пайызы орындалды. Алаңнан тыс жылу желісін жүргізу аяқталды. Ал алаңішілік жылу желісінің 75 пайызы жүргізілді.
Қазір автокөлік жолы мен абаттандыру ісі де жүріп жатыр. Шағын аудандағы № 1 және № 4 көшеден басқасында астыңғы ірі қабатты асфальт салынды. Жолдың дайындығы — 60 пайыз.
— Магистралдық байланыс желісінің 70 пайызы дайын тұр. Үйаралық байланыс желісін жүргізу жер қазу жұмысының кедергі келтіруіне байланысты тоқтатылып тұр, — деп мәлімдеді әкімнің баспасөз хатшысы.
Еске сала кетелік, былтыр Атырауда 13,6 млрд теңге бөлінген 7 тұрғын үйдің құрылысы әлі бітпей тұрғанын жазған едік.
