Атырауда бір тәулікте 30 сәби өмірге келді

Атырауда соңғы бір тәулікте 30 нәресте жарық дүние есігін ашты. Оның арасында бір егіз бар, деп хабарлайды Kazinform. 

Атырау облыстық перинаталдық орталығы баспасөз қызметінің мәліметінше, былтыр 301 егіз дүниеге келген.

«Былтыр облыстық перинаталдық орталықта 7 863 бала жарық дүние есігін ашты. Оның ішінде 301 егіз бар. Егіздің бірі 2023 жылғы 31 желтоқсанда сағат 15:20-да өмірге келді. Орталықта 31 желтоқсаннан 1 қаңтар күнгі сағат 09:00-ге дейін 30 сәбидің дүниеге келгені тіркелді. Жаңа туған нәрестелердің 14-і қыз болса, ал 16-ы – ұл», - деді орталықтың баспасөз қызметі.

Еске сала кетелік, бұған дейін Атырауда дүниеге келген 20 миллионыншы сәбидің есімі Мұхаммад екенін жазған едік.

Берік Жұмағазиев пен Айдана Оразымбетованың отбасындағы тұңғыштың бойы – 54 см, салмағы – 3 660 грамм. Еліміздегі 20 миллионыншы тұрғын болып тіркелген сәбидің ата-анасына «Отбасы банк» АҚ облыстық филиалының директоры Нұржан Мұғалімов 2 млн теңгенің сертификатын табыс етті.

Оның айтуынша, бұл қаржыны баланың болашақтағы қажеттілігі үшін банк депозитіне салуға болады. Кейін бұл қаржыны Мұхаммадтың оқуына немесе баспана алуына пайдаланады.