Атырауда қауіпті үтікті сатқан кәсіпкер 672 мың теңге айыппұл төледі

Атыраулық кәсіпкер қауіпті үтікті сатқан 672 мың теңге айыппұл төледі, деп хабарлайды Kazinform.

Атырау облысы бойынша техникалық реттеу және метрология департаментінің мәліметінше, кәсіпкер Қытайда шығарылған ORM-088 «ORVICA» маркалы электрлі үтікті сатқан. Алайда, бұл үтіктің Кеден одағының техникалық регламентінің қауіпсіздік талаптарына сәйкес келмейтіні анықталған.

«Елімізде «Техникалық реттеу туралы» заңның 35-бабына сәйкес бағалаудан өтпеген, сәйкестікті бағалау туралы құжаттарсыз, техникалық реттеу, Еуразиялық экономикалық одақтың сәйкестікті бағалау туралы қабылданған құжаттарының бірыңғай тізілімдерінде осындай құжаттардың бар-жоғы туралы мәліметтер болмаған кезде өнімді айналысқа шығаруға тыйым салынады. Тексеру кезінде бұл жабдықта өртке қарсы қаптама және тоқ соғудан қорғау үшін қажетті жерге қосу сымы болмағаны анықталды. Сол себептен, құқық бұзушыға ҚР Әкімшілік құқық бұзушылық туралы кодексінің 415-бабының 1-бөлігімен 672 мың 750 теңге мөлшерінде айыппұл салынды. Айыппұл толық көлемде төленді», -деп хабарлады департаменттің баспасөз қызметі.

Еске сала кетелік, бұдан бұрын Атырауда Ресейден әкеле жатқан химикатқа берілген қорытынды күмән тудырғанын хабарлаған болатынбыз.