Атырауда қылмыстық топ құрып, салық төлеуден жалтарған күдіктіге іздеу жарияланды

АТЫРАУ. KAZINFORM – Атырауда қылмыстық топ қызметін ұйымдастыру, салық төлеуден жалтару, қылмыстық жолмен алынған ақшаны жылыстату күдігіне ілінген бизнес-менеджерге қатысты тергеу аяқталды.

Бұл туралы Қаржылық мониторинг агенттігі Атырау облыстық экономикалық тергеп-тексеру департаментінен хабарлады. 

– «KSS» ЖШС-нің бұрынғы бизнес-менеждері Барлық Меңдіғазиевке қатысты ҚР Қылмыстық кодексінің 262-бабының 1-бөлігімен, 245-бабының 3-бөлігімен, 218-бабының 3-бөлігінің 2 және 3-тармағымен (Қылмыстық топтың қызметін ұйымдастыру, салық төлеуден жалтару және қылмыстық жолмен алынған ақшаны жылыстату) қозғалған сотқа дейінгі тергеу аяқталды. Күдікті Қазақстан Республикасының аумағынан тыс жерде болғандықтан, халықаралық іздеу жарияланды, -деп мәлім етті жергілікті департаменттен. 

Еске сала кетелік, бұдан бұрын Атырауда заңсыз құмар ойынға ақша қабылдаған кассирге 738 мың айыппұл салынған хабарлаған болатынбыз.