Атырауда өзге тілде жазылған жазуы бар мемлекеттік тумен фотоға түскендер ұсталды

АТЫРАУ. KAZINFORM – Атырудың 4 тұрғыны өзге тілде жазылған жазуы бар мемлекеттік туды ұстап, фотоға түскен. Жергілікті полиция қызметкерлері мемлекеттік рәміздерді қорлау бабымен қылмыстық іс қозғады. 

Атырау облыстық полиция департаментінің баспасөз қызметінен мәлім еткендей, қазір сотқа дейінгі тергеу басталған.

— Әлеуметтік желіде таралған фотоға байланысты мемлекеттік рәміздерді қорлау бабымен қылмыстық іс қозғалды. Сотқа дейінгі тергеу амалдары жүргізіліп жатыр. Таралған жазбадағы төрт күдікті анықталып, полиция бөлімшесіне жеткізілді. Олардың екеуі — кәмелетке толмаған жасөспірім. Сол себептен, ата-аналарының қатысуымен жасөспірімдерден жауап алынып жатыр. Өзге ақпарат тергеу мүддесіне сәйкес жариялауға жатпайды, - деп мәлім етті полиция департаментінің баспасөз қызметі. 

Еске сала кетелік, бұдан бұрын Түркістан облысында экстремистік материалдарды таратқан топ ұсталғаны хабарланған болатын.