Атырауда Сарыөзек каналынан 80 келі өлген шабақ жиналды
АТЫРАУ. KAZINFORM — 21 шілдеде әлеуметтік желілерде Атырау облысы Махамбет ауданы Бейбарыс ауылында орналасқан Сарыөзек арнасында балық қырылғаны туралы ақпарат тарады.
Бұл дерек бойынша құзырлы мемлекеттік органдар, жергілікті атқарушы органға, сондай-ақ ғылыми ұйымдарға жедел түрде хабарланды.
Жайық-Каспий облысаралық бассейндік балық шаруашылығы инспекциясының басшылығы мен Атырау қаласы бойынша экология департаментінің өкілдері, Бейбарыс ауылы әкімдігінің, сондай-ақ ғылыми ұйым мен «Қазсушар» РМК өкілдерінен құрылған комиссия балық қырылған жерге шықты.
Шабақтардың қырылуы туралы ақпарат расталды. Өлген шабақтардың жалпы салмағы — шамамен 80 кг.
Жергілікті атқарушы органдар санитарлық нормаларды сақтай отырып, өлген шабақтарды жинап, жойды.
Шабақтардың қырылуына Сарыөзек каналындағы судың төмен деңгейі себеп болды (судың тереңдігі — 40-50 см). Атырау облысы экология департаменті зертханалық зерттеу жүргізу үшін су сынамасын алды.
Балық қорғау қызметкерлерімен, жергілікті атқарушы органдардың, балық шаруашылығы субъектілерінің өкілдерімен, еріктілермен бірлесіп балық шабақтарын құтқару жұмыстары жүріп жатыр.
Құтқарылған шабақтар — сазан, табан, көксерке, жайын және ұсақ мөңке балықтары, орташа салмағы — 12-14 грамм, саны 100 мыңнан асады.
Қазіргі уақытта су қоймасында шабақтарды құтқару жұмыстары жалғасып жатыр.
