Атырауда сот екі түлекке «Алтын белгі» беруден бас тарту туралы шешімді заңсыз деп тапты

АТЫРАУ. KAZINFORM — Сот облыстық білім беру басқармасы комиссиясының екі түлекке «Алтын белгі» беруден бас тарту шешімін заңсыз деп таныды.

Өңірдегі орта мектептердің бірін екі оқушы үздік аяқтап, тиісті үлгідегі аттестаттар алған. Дегенмен, білім беру басқармасының комиссиясы педагогтер енгізген бағаларға түзетулерді негізге алып, оларға «Алтын белгі» беруден бас тартқан.

Мектеп түлектерінің ата-аналары бұл шешіммен келіспей, сотқа жүгінген.

— Талап қоюшылардың 5-11 сыныптар аралығында барлық пән бойынша жылдық, тоқсандық және қорытынды бағалары «үздік» болған, сондай-ақ қорытынды аттестаттаудан сәтті өткен, бұл «Алтын белгі» алу талаптарына сәйкес келеді. Бағаларды қою, өзгерту және түзету тек педагогтердің құзыреті мен жауапкершілігіне ғана қатысты, осыған байланысты оқушылар мұғалімдер тарапынан болуы мүмкін қателіктер немесе процестік бұзушылықтар үшін жауапты болмауы тиіс және теріс салдары болуы мүмкін емес, — деп мәлімдеді облыстық соттың баспасөз қызметі.

Сонымен қатар, сот Білім және ғылым министрінің бұйрығының ережелерін ескерген. Оған сәйкес модерация рәсімі оқушылардың оқу жетістіктерін бағалау бойынша даулы мәселелер болған кезде ғана қолданылады. Бұл жағдайда мұндай даулы мәселе болмаған, бұл білім беру басқармасының модерацияны жүргізу туралы талаптарын негізсіз қылады.

Сот педагогтер енгізген түзетулерге негізделген комиссия шешімін заң талаптарына қайшы деп таныды, мектеп бітірушілерге қатысты комиссия отырысының даулы хаттамасының күшін жойды және басқармаға «Алтын белгі» беру туралы мәселені қайта қарауды міндеттеді.

Сот актісі заңды күшіне енді және қазіргі уақытта орындалу сатысында.

Бұған дейін сот ұйғарымын орындамаған БҚО білім басқармасының басшысы айыппұл төлегенін хабарладық.