Атырауда табиғатты ластайтын кәсіпорындар электронды түрде бақыланады

Атырауда қоршаған ортаны ластайтын кәсіпорындарды электронды түрде бақылау жоспарланып отыр. Осыған байланысты мониторинг жүргізетін арнайы автоматтандырылған жүйе іске қосылады, деп хабарлайды Kazinform.

Атырауда «Климаттық диалог: өзара әрекеттестіктің тұрақты стратегиялары» тақырыбымен халықаралық форум өтті. Форумға БҰҰ Жаһандық коммуникациялар департаментінің өкілі Властимил Самек, Атырау облысы әкімінің орынбасары Жасұлан Бисембиев, ірі мұнай компанияларының өкілдері мен сарапшы мамандар қатысты.

«Әлем елдерін толғандырып отырған мәселенің бірі – климаттың өзгеруі. Жаһандық жылынудың түрлі себебі болуы мүмкін. Мәселен, Атырау облысында мұнай-газ саласы қарқынды дамып, өндіріс орындары көбейді. Соған байланысты қоршаған ортаға түсетін салмақ арта түсті. Атырау – табиғаты қатал, шөлейтті аймақтар қатарындағы өңір. Бұл атмосфералық ауа сапасының нашарлауына, су айдындарының таяздауына әсер етеді», - деді Жасұлан Бисембиев.

Оның пікірінше, аймақтың экожүйесін жақсарту мақсатында бірқатар іс-шара қолға алынған. Климаттың өзгеру әсерін талдау және тұрақты стратегияларды құру жолдарын табу. Сондай-ақ тұрақты дамудағы университеттердің рөлін арттырып, қоршаған ортаны қорғауды насихаттау және тұрақты технологияларды дамытуда білім беру мекемелеріне қолдау көрсету. Сонымен қатар климаттық инновациялар бойынша көміртегі ізін азайтуға көмектесетін озық технологиялар мен инновациялық шешімдерді енгізу.

«Президент көміртегі бейтараптылығына қол жеткізу үшін 2030 жылға қарай парниттік газдардың шығарындысын 15 пайызға азайту жөнінде тиісті тапсырма берді. Осыған орай экологиялық ахуалды жақсарту үшін табиғи ресурстарды тиімді пайдалану мәселесіне түбегейлі бетбұрыс жасауды көздедік. Біз I санатты ірі кәсіпорындармен бірлесіп, шығындыларды түбегейлі азайту жөнінде арнайы жоспар қабылдадық. Алдағы жылы арнайы автоматтандырылған мониторинг жүйесі іске қосылады. Мониторинг арқылы кәсіпорындардың қоршаған ортаға қандай шығарынды жіберетінін электронды түрде бақылай аламыз. Біз солай жедел басқару түріне көшеміз», - деді Жасұлан Бисембиев.

Еске сала кетелік, бұдан бұрын Атырауда заң бұзған екі кәсіпорын 735 млн теңге айыппұл төлегенін хабарлаған болатынбыз.