Атырауда таныс қызды көлікке күштеп мінгізген жігітке айыппұл салынды

АТЫРАУ. KAZINFORM — Атыраулық жігіт өзімен құрдас танысын көлікке күштеп мінгізген. Сот қаулысымен бұзақылық жасаған жігітке айыппұл салынды.

Атырау қалалық әкімшілік құқық бұзушылықтар жөніндегі мамандандырылған сотында Е.-ге қатысты әкімшілік іс қаралды. Кінәліге ҚР Әкімшілік құқық бұзушылық туралы кодексінің 434-бабының 1-бөлігімен айып тағылған. 

— Е. 18 ақпанда өзінің танысы К.-ны оның келісімімен өзінің автөкөлігіне отырғызған. Жолда екеуінің арасында жанжал туындаған. Соның нәтижесінде К. әрі қарай барудан бас тартып, көліктен шығып кеткен. ️Алайда, Е. бұзақылық ниетпен, К.-ның еркінен тыс, қарсылығына қарамастан, күшпен оны көлікке қайта отырғызып, ұсақ бұзақылық жасаған, — деп хабарлады аталған соттан.

Жәбірленуші К. өз түсініктемесінде Е. оны үйіне дейін жеткізгенін, оған ешқандай талабы жоқ екенін көрсетті.

Ал Е.-нің кінәсі өзінің мойындау жауабымен, әкімшілік құқық бұзушылық туралы хаттамамен, баянатпен, сауал қою хаттамасымен дәлелденді.

Сот қаулысымен құқық бұзушы Е. айып тағылған баппен кінәлі деп танылды. Құқық бұзушыға 78 мың 640 теңге мөлшерінде әкімшілік айыппұл салынды.

Сот қаулысы заңды күшіне енген жоқ.

Еске сала кетелік, бұдан бұрын Атырауда 22 жастағы бойжеткенді көлікке күштеп мінгізген жігіт қамауға алынғанын хабарлаған едік.