Атырауда жерді заңсыз пайдаланған шаруа қожалығына 2,5 млн теңге айыппұл салынды

АТЫРАУ. KAZINFORM — Атырау облысында шаруа қожалығының мемлекеттің иелігіндегі жерді заңсыз пайдаланғаны анықталды. Сот шешімімен шаруа қожалығына 2,5 млн теңге айыппұл салынды.

Атырауда жерді заңсыз пайдаланған шаруа қожалығына 2,5 млн теңге айыппұл салынды
Фото: Kazinform

Жер ресурстарын басқару комитетінің мәліметінше, Атырау облыстық жер ресурстарын басқару департаменті мен Атырау көлік прокуратурасы мемлекеттің иелігіндегі жерді пайдалану бойынша тексеру жүргізген. 

— Тексеру қорытындысымен жерді заңсыз пайдалану дерегі анықталды. Жерді пайдалануға қатысты заң талабын бұзған шаруа қожалығына ҚР Әкімшілік құқық бұзушылық туралы кодексінің 136-бабына сәйкес 2 млн 584 мың 400 теңге айыппұл салынды. Шаруа қожалығының сот шешіміне қарсы қойған талаптары қабылданбады, - деп мәлім етті аталған комитеттен.

Сондай-ақ Атырау облыстық жер ресурстарын басқару департаменті шаруа қожалығына Махамбет ауданында орналасқан 100 гектар аумақты игеру туралы ұйғарым берген. Алайда ұйғарым нұсқамасының орындалмаған. Соған байланысты жер учаскесі ҚР Жер кодексінің 94-бабына сәйкес мәжбүрлі түрде қайтарылып алынған.

Еске сала кетелік, бұдан бұрын Атырау облысында 92 мың гектар жер телімі мемлекет меншігіне қайтарылғанын жазған едік.

Соңғы жаңалықтар