Атыраудағы Сарыөзек каналы маңынан 9 шаруа қожалығы қауіпсіз аумаққа көшіріледі

АТЫРАУ. KAZINFORM – Атыраудағы Сарыөзек каналы маңынан 9 шаруа қожалығы қауіпсіз аумаққа көшірілетін болды.

Атырау облысы жедел штабының ақпаратына сүйенсек, тасқын суға қарсы жұмыс бірнеше учаскеде жалғасып жатыр. Ал, Сарыөзек каналы 107-учаске ретінде белгіленген. Аталған учаскенің үйлестірушісі Қадыржан Сиюмовтың айтуына қарағанда, канал маңындағы ауылдардың қатарында Бестал елді мекені де бар. Тасқын су қаупінің алдын алу үшін мал және егін шаруашылығымен айналысатын тұрғындарға қауіпсіз аумаққа көшу туралы ескерту берілген.

«Сарыөзек каналының Еркінқала ауылдық округі аумағындағы жағалауына таяу маңда 30 шаруа қожалығы орналасқан. Оның ішінде Бестал ауылында 15 шаруа қожалығы тіркеліп отыр. Төтенше жағдай жарияланған кезден бері 6 шаруа қожалығы малын қауіпсіз аумаққа малын көшіріп әкетті. Ал бүгін 9 шаруа қожалығының жетекшілеріне түсіндіру жұмысы жүргізіліп, тұрғындар мен малды қауіпсіз аумаққа көшіру ұсынылды», - деп хабарлады каналына жауапты маман Қадыржан Сиюмов.

Оның айтуынша, Жайық өзенімен ағып келген тасқын су Сарыөзек каналымен Каспий теңізіне құйылуға тиіс. Судың кедергісіз ағуына жола ашу үшін қоқыс жиналып жатыр.

Еске сала кетелік, бұдан бұрын Тасқын су Атырау маңындағы Соколок каналының бөгетін бұзып кеткенін хабарлаған болатынбыз.