Атыраудағы тасқын: Қызылқоға шаруаларына 62 млн теңге өтемақы тағайындалды

АТЫРАУ. KAZINFORM – Биылғы көктемде Атырау облысындағы Қызылқоға ауданында Ойыл өзені тасып, жұртты әбігерге салған еді. Су тасқынынан зардап шеккен шаруаларға 62 млн теңгеге жуық өтемақы тағайындалды. 

Атырау облысы әкімінің баспасөз қызметінен мәлім еткендей, бұл ауданда 58 шаруа қожалығы мен тұрғындардың өлген малы үшін есептелген шығын өтеліп жатыр.

«Табиғи сипаттағы төтенше жағдайдан зардап шеккендерге келтірілген зиянды бағалау және өтеу жөніндегі комиссияға мал шығыны бойынша түскен өтініштің бәрі қаралды. Комиссияның қорытындысымен 58 шаруа қожалығы мен жеке тұлғалардың 191 малы үшін бюджеттен және өзге көздерден 61 млн 772 мың 062 теңге өтемақы тағайындалды», - деп хабарлады әкімдіктің баспасөз қызметі.

Өтемақыға алғандардың бірі – Жасұлан Есқалиев. Біраз жыл бұрын «Дәурен» шаруа қожалығын құрған.

«Комиссияға су тасқынынан болған шығынға байланысты құжаттарымды жинақтап, тапсырған едім. Соған байланысты өтемақы берілді. Өтемақы қаржысынан шаруа қожалығымдағы үйім мен сарайымды жаңарттым. Жылқы санын көбейттім. Үш ірі қара мал сатып алып, қожалығымдағы жұмысымды қалпына келтірдім. Қазір шаруа қожалығымның жұмысы реттелді. Еңдігі мақсатым – мал санын әлі де көбейтіп, шаруашылығымды одан әрі дамыту», - дейді Жасұлан Есқалиев.

Еске сала кетелік, бұған дейін Құлсарыда су тасқынынан зардап шеккен отбасы өтемақыға коттедж сатып алғанын хабарлаған болатынбыз.