Атыраудың экс-әкімінің ісі: Шенеуніктерге тағылған қандай айыптаулар расталмады
АТЫРАУ. KAZINFORM – Атырау қаласының бұрынғы әкімі Қайрат Оразбаев пен жер қатынастары бөлімінің басшысы Наурызбек Құмаровқа, сәулет және қала құрылысы бөлімінің басшысы Ерлан Қабдиновке, әкімдік аппаратының бөлім басшысы Жігер Ибатоллаұына қатысты қылмыстық істе бірнеше айыптау расталған жоқ.
Әкімдіктің бұрынғы лауазымды басшыларына қатысты қылмыстық іс Атырау қаласындағы №2 сотында қаралды.
Сот материалдарына қарағанда, қылмыстық қудалау органдары тергеуінің қорытындысымен экс-әкім мен бұрынғы бөлім басшылары бірнеше баппен айыпталған.
Мәселен, қала әкімі Қайрат Оразбаевқа ҚР Қылмыстық кодексінің 361-бабының 4-бөлігінің 3-тармағы (Лауазымдық өкілеттіктерді теріс пайдалану), 369-бабының 3-бөлігі (Қызметтік жалғандық жасау) бойынша; қалалық жер қатынастары бөлімінің басшысы Наурызбек Құмаровқа, әкім аппараты бөлімінің басшысы Жігер Ибатоллаұлы мен сәулет және қала құрылысы бөлімінің басшысы Ерлан Қабдиновке 361-бабының 4-бөлігінің 3-тармағы (Лауазымдық өкілеттіктерді теріс пайдалану), 369-бабының 1-бөлігімен (Қызметтік жалғандық жасау), 190-бабының 4-бөлігінің 2-тармағымен (Алаяқтық) айып тағылған.
– Сот талқылауының қорытындысында мынадай жайттар анықталды. Қайрат Оразбаев қала әкімі бола тұра, жер қатынастары бөлімінің басшысы Наурызбек Құмаровқа, сәулет және қала құрылысы бөлімінің басшысы Ерлан Қабдиновке рекреациялық аймақтағы 8 жер учаскесін беру туралы тапсырма берген. Сотталушылар Наурызбек Құмарров пен Ерлан Қабдинов өзара сөз байласып, рекреациялық және санитарлық аймақтардағы 18 жер учаскесін берген. Бұл үшін Наурызбек Құмаров жер комиссиясының хаттамасының қосымшасына комиссия отырысында қаралған деп 18 өтініш туралы жалған мәліметтер енгізген, -деп хабарлады соттың баспасөз қызметі.
Алайда бірнеше айыптау расталмады. Біріншіден, Жігер Ибатоллаұлы қызметтік өкілеттіктерді асыра пайдаланды деген айыппен оның осы қылмысты жасауға қатысы бар екендігі туралы жеткілікті дәлелдер ұсынылмаған. Оның қызметтік өкілеттігіне рекреациялық және санитарлық аймақтардағы жер учаскелерін беру мәселесі кірмеген.
Екіншіден, Қайра Оразбаев пен Жігер Ибатоллаұлына тағылған айыптауда қандай құжаттарға (жер учаскесін таңдау актілері, жер комиссиясының хаттамалары және т.б.) жалған мәліметтер немесе түзетулер енгізілгені нақтыланбаған.
Үшіншіден, аталған сотталушылармен құжаттарға жалған мәліметтер енгізілу фактілері анықталмаған.
Төртіншіден, қылмыстық қудалау органымен мүлікті жымқыру дәлелдері ұсынылмаған. Сотталушылардың бірдей әрекеттері өкілеттіктерді теріс пайдалану және алаяқтық ретінде әртүрлі баптар бойынша дәрежеленген.
– Қайрат Оразбаев пен Ерлан Қабдинов ҚР Қылмыстық кодексінің 361-бабының 4-бөлігінің 3-тармағымен (Лауазымдық өкілеттіктерді теріс пайдалану) кінәлі деп танылды. Ерлан Қабдиновке 5 жыл мерзімге бас бостандығын шектеу, Қайрат Оразбаевқа тағылған айыптың аз көлемі ескеріліп, 3 жыл мерзімге бас бостандығын шектеу түріндегі жаза тағайындалды. Наурызбек Құмаров 361-баптың 4-бөлігінің 3-тармағымен (Лауазымдық өкілеттіктерді теріс пайдалану) және 369-бабының 1-бөлігімен (Қызметтік жалғандық жасау) кінәлі деп танылып, оған 6 жыл мерзімге бас бостандығын шектеу түріндегі жаза берілді. Олар өмір бойына мемлекеттік қызметте лауазымдарды атқару құқығынан айырылды, -деп мәлім етті соттан.
Ал Жігер Ибатоллаұлы ҚР Қылмыстық кодексінің 361-бабының 4-бөлігінің 3-тармағы бойынша оның әрекеттерінде қылмыстық құқық бұзушылық құрамының болмауына байланысты ақталды.
Сондай-ақ Қайрат Оразбаев, Ерлан Қабдинов пен Жігер Ибатоллаұлы 369-бабының 1-бөлігі бойынша, Ерлан Қабдинов, Наурызбек Құмаров және Жігер Ибатолаұлы 190-бабының 4-бөлігінің 2-тармағында көзделген қылмыстық құқық бұзушылық құрамының болмауына байланысты ақталды.
Сот үкімі заңды күшіне енген жоқ.
Еске сала кетелік, бұған дейін Атырау қаласының экс-әкімі Қайрат Оразбаевтың ісіне қатысты сот үкімі шыққанын жазған едік.
