Атыраудың маңындағы каналда балық өліп жатыр

АТЫРАУ. KAZINFORM – Атырау қаласының маңындағы каналда балық өліп жатыр.  Бұл деректі Жайық-Каспий облысаралық бассейндік балық шаруашылығы инспекциясы растап отыр.

Инспекцияның мәліметінше, бұл туралы бүгін, 29 шілдеде әлеуметтік желі мен су айдындарына жүргізілген мониторинг кезінде анықталған. Балық Атырау қаласының маңындағы Теплый каналында қырылған.

«Жайық-Каспий облысаралық бассейндік балық шаруашылығы инспекциясы балықтың өлімі туралы балық ресурстары мен басқа да су жануарларының қауіп-қатері және (немесе) өлімі анықталған кезде өзара іс-қимыл схемасына сәйкес барлық мүдделі мемлекеттік органдарды хабардар етті. Осы ақпаратты тексеру үшін жоғарыда аталған мемлекеттік органдардың өкілдерінен тұратын комиссия балық өлімінің болжамды орнына шықты», - деп хабарлады облысаралық инспекциядан.

Теплый каналындағы судың температурасы - +39,5 градус, оттегінің мөлшері – 6 мл/дм3. Су жылу электр орталығының қазандықтары салқындағаннан кейін каналға түседі. Сондай-ақ, шабындық аумақты суару үшін қолданылады.

Еске сала кетелік, Атырауда маусымнан бері 49,9 млн балық шабағы құтқарылғанын хабарлаған едік.