Атқарылған жұмыс нәтижесі бойынша жалақы есептеу жүйесі енгізіледі - Мемлекеттік қызмет істері агенттігі

АСТАНА. ҚазАқпарат - Қазақстанда мемлекеттік қызметшілердің жаңа еңбекақы жүйесін жасақтау жоспарлануда. Онда атқарылған жұмыс нәтижесі бойынша жалақы есептеу принциптері енгізілетін болады. Бұл туралы «ҚазАқпарат» агенттігінің ресми сауалына берген жауабында ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары Саян Ахметжанов хабарлады.

«Қазіргі таңда мемлекеттік қызметшілердің еңбекақы жүйесі екі көрсеткішке - атқарып отырған лауазымының деңгейі мен мемлекеттік қызметтегі еңбек өтіліне негізделген. Осыған сәйкес, мемлекеттік қызметшілердің еңбекақысы белгіленген коэффиценттермен есептеледі. Алайда, бұл жағдайда мемлекеттік қызметкердің атқарған еңбегі мен қызметі және салаға, жұмысқа қосқан нақты үлесі ескерілмейді. Түптеп келгенде, мемлекеттік қызметшіні бағалаудың нәтижесіне еңбекақының ешқандай қатысы болған жоқ», - дейді ол.

Мемлекет басшысы Нұрсұлтан Назарбаевтың тапсырмасына сәйкес, алдағы уақытта еңбекақы төлеудің жаңа жүйесінде мемлекеттік органның басшысы өзі басқарып отырған органға жүктелген тапсырмалар мен қызметтерді атқаруға қажетті қызметкерлер санын өздігінше анықтай алатындай мүмкіндік қарастырылуы мүмкін.

«Атқарылған жұмыстар нәтижесі бойынша жалақы есептеліп, жасаған жұмысы тиімдірек қызметкерлерге сыйақы төлену жағдайы да қарастырылуда. Бұл ретте кез-келген мемлекеттік қызметшінің нәтижеге қол жеткізуге деген жауапкершілігінің артатыны сөзсіз. Әрине, өз кезегінде осы айтылған мақсаттарға қол жеткізу үшін мемлекеттік қызмет туралы қолданыстағы заңнмалар мен еңбекақы төлеудің жүйесіне өзгерістер енгізу талап етіледі», делінген оның жауабында.