Атырау облысында тұрғындардың 60 пайызы вакцина салдырды
АТЫРАУ. ҚазАқпарат – Атырау облысында екпе алу тізіміне енген тұрғындардың 60 пайызы вакцинаның толық екі компонентін салдырды, деп хабарлайды ҚазАқпарат.
Облыстық денсаулық сақтау басқармасының баспасөз қызметінен мәлім еткендей, 1 ақпаннан бері коронавирус инфекциясы вакцинасының I компонентін 243 085 адам ектірген. Бұл облыста вакцина алуға жататын тұрғындардың жалпы санының 66%-ы.
«Өңірде вакцинаның II компонентін алған адамдардың саны 220 341-ге жетті. Бұл – вакцина салдырушы тізіміне енген контингенттің 60%-ы. Екпе алудың жоғары көрсеткіші Атырау қаласы (67,3%) мен Қызылқоға ауданында (62,4%) тіркеліп отыр. Ал, төмен көрсеткіш Махамбет (54,7%) және Жылыой ауданында (37,1%) байқалды», - деп мәлім етті басқарманың баспасөз қызметінен.
Осыған орай вакцина алуға байланысты көрсеткіші төмен аудандарда ақпараттық-түсіндіру жұмысын жандандыру туралы шешім қабылданған.
Еске сала кетелік, бұдан бұрын Атырау облысында мыңға жуық адам вакцинаның екі компонентін алғанын жазған болатынбыз.
