Атырау облысында үш күнде жол ережесі 644 мәрте бұзылған
АТЫРАУ. ҚазАқпарат – Атырау облысында үш күнде жолда жүру ережесі 644 рет бұзылған. Мас күйде рульге отырған 10 адам ұсталды, деп хабарлайды ҚазАқпарат.
Облыстық полиция департаментінің баспасөз қызметінен мәлім еткендей, 4-6 наурыз аралығында өңір аумағында «Мас жүргізуші – қылмыскер» рейді өткен.
«Бұл іс-шараны өткізудегі мақсат – мас күйде рульге отыратындарды, көлік жүргізу құқығынан айырылған жүргізушілерді анықтау. Олардың қатысуымен болуы мүмкін жол-көлік оқиғаларының алдын алу. Үш күнге созылған іс-шара кезінде 644 жолда жүру ережесін бұзған 644 дерек анықталды. Көлік құралын мас күйде басқарған 10, жүргізуші куәлігінен айырылған 1 адам ұсталды», -дейді полиция департаментінің бастығы, полиция полковнигі Нұрхат Оразбаев.
Еске сала кетелік, бұған дейін Атырау облысында заңсыз сақталған 24 қару тәркіленгенін жазған едік.
