Атырау облысындағы Махамбет ауданына жаңа әкім тағайындалды

АТЫРАУ. ҚазАқпарат - Бүгін облыс әкімі Нұрлан Ноғаев аудандық мәслихат депутаттарына өз еркімен лауазымын босатқан Махамбет ауданының әкімі Сырым Рысқалиевтің орнына жаңа басшының кандидатурасын ұсынды, деп xабарлайды ҚазАқпарат тілшісі.

Облыс әкімі Рысқалиевке атқарған жұмысы үшін алғыс айтып, жаңа қызметінде табыс тіледі. Аймақ басшысы депутаттарға ҚР Президенті Әкімшілігімен келісілген Жәрдемғали Ахметовті таныстырды. Депутаттар үміткерді қолдады. 

Жәрдемғали Ахметов - 1984 жылы Батыс Қазақстан ауыл шаруашылығы институтын «экономика және ауыл шаруашылығын ұйымдастыру» мамандығы бойынша бітірген. Мемлекеттік қызметте ұзақ жылғы еңбек өтілі бар.
1976 -1978 жылдары әскери борышын өтеген.
1984 - 2012 жылдары Жылыой ауданында қатардағы экономистен бастап аудан әкімінің орынбасарына дейінгі лауазымда мемлекеттік қызмет атқарған.
2012 жылы Исатай ауданының әкімі болып тағайындалды.
2013 жылдың мамыр айында Атырау облыстық экономика және бюджетті жоспарлау басқармасына басшы болды.
Соңғы қызметке тағайындалғанға шейін 2013 жылдан бастап Жылыой ауданы әкімінің орынбасары лауазымында қызмет етті.