Атырау облысының 8 ауылында жарық әлі қосылған жоқ
Бұдан бұрын Атырау облысында 38 мыңнан астам абонент жарықсыз қалған болатын.
Облыстық төтенше жағдайлар департаменті баспасөз қызметінің мәліметінше, Құрманғазы ауданында екпіні секундына 22-23 метрге жеткен қатты жел соққан. Соның салдарынан электр энергиясының желісінде ақау болған. Ауданның 16 ауылында 5 наурызда сағат 3:10-да жарық сөніп қалған.
Ал, кеше, 6 наурызда жергілікті уақытпен кешкі 20:00-ге дейін 10 ауыл жарықсыз отырғанын жазған едік.
«Құрманғазы ауданының біраз ауылында қатты желден сөнген электр энергиясын қайта қалпына келтіру жұмыстары жалғасып жатыр. Қазір аудандағы 8 ауылдық округте (Теңіз, Бірлік, Сафон, Кудряшов, Көптоғай, Еңбекші, Мақаш, Ақкөл) электр желісіндегі ақауды қалпына келтіріп, қосу жұмыстарын жүргізуге «Атырау-Жарық» АҚ-ның 10 бригадасы, 60-қа жуық жұмысшысы мен 23 техника жұмылдырылған. Жергілікті ауылдық округтердің әкімдері тұрғындарды жұмыс барысынан тұрақты түрде хабардар етіп, ахуалды бақылауда ұстап отыр», -деп хабарлады өңірлік коммуникациялар қызметі.