Атырау облысының қос ауданында IT-сыныптар ашылды
«Нұр Отан» партиясы Атырау облыстық филиалының баспасөз хатшысы Эльмира Тұңғатарованың айтуынша, жаңа партиялық жобаларды және елорданың 20 жылдық мерейтойы мен Президенттің бес әлеуметтік жобасын насихаттау облыстың барлық аудандарында өткізіліп жатқан «Бірыңғай партия күні» шарасы аясында өтіп жатыр.
12 жасар Ақылбек Сүлейменовтің компьютерлік бағдарламаларға қызығушылығы зор.
«Өз бетімше шағын мультфильмдер құрастыруды үйренгім келіп жүргенде IT-сынып ашылғаны өте жақсы болды. Енді мен бұл жерде анимациялық фильмдер жасауды, түрлі ойындар құрастыруды үйренемін», - дейді ол.
Ақылбек Жылыой ауданы Құлсары қаласындағы №8 мектеп жанынан ашылған IT-сыныптың алғашқы оқушыларының бірі.
«Ауданымызда «Нұр Отан» партиясының бастамасымен балалар үшін IT-сыныптың ашылуы елдің бас партиясының ерекше қамқорлығы деп білемін. Және бұл заман талабына сай ашылған арнайы сыныптың 8 жастан бастап балаларды қабылдауы көңіл қуантады. Немерем қазір 8 жаста, жаңа технологияларды жетік меңгерген. Бұл жерде білімін шыңдап, болашағына бағдар алып шығарына сенімдімін», - дейді Исатай ауданының тұрғыны Надежда Құрманғалиева.
Айта кету керек, «Цифрлық Қазақстан» мемлекеттік бағдарламасын жүзеге асыру мақсатында қолға алынған жоба аясында Атырау облысында биыл 10 ІТ-сынып ашу жоспарланған. Бұл мектептерде 2018 жылы - 700, 2019 жылы 1500, 2020 жылы 2000 бала оқытылатын болады.
Сонымен қатар, «Рухани жаңғыру» бағдарламасы бойынша ауылдық жерлерде ағылшын тілін үйренуге қолайлы орта қалыптастыру жұмыстары қолға алынған. Бұл мақсатта ағымдағы жылдың маусым айынан бастап Атырау облысы бойынша 185 ағылшын тілін үйрететін арнайы жазғы лагерьлер ашылады.
Бүгін Исатай ауданында өткен «Бірыңғай партия күні» шарасы аясында Аққыстау орта мектебінде ағылшын тілін үйрететін жазғы лагерь өз жұмысын бастады.