Атырауда азық-түлік дүкені ретінде тіркелген букмекерлік кеңселер анықталды
АТЫРАУ. ҚазАқпарат - Атырау облысының Мақат ауданында букмекерлік кеңселер азық-түлік дүкендері ретінде астыртын жұмыс істеген, деп хабарлайды «ҚазАқпарат» ХАА тілшісі.
«Облыстық ІІД ұйымдасқан қылмыспен күрес басқармасы жүргізген рейд барысында ауданда заңсыз жұмыс істеп келген үш букмекерлік кеңсе анықталды. Оның иесі кеңсені азық-түлік дүкені ретінде тіркеп, ашқан. Алайда негізгі есік жабық болған, ойынханаға келушілер ішке құпия есік арқылы кірген. Тексеру барысында кассирлерден 697 мың 840 теңгені құрайтын түрлі номаиналды ақша, сондай-ақ 16 лотереялық ойын терминалдары, «Crown» маркалы 5 процессор, 5 термопринтер мен сканер, сондай-ақ интернетке кіру үшін модемдер тәркіленді», - деп хабарлайды ІІД-ның баспасөз қызметі. 
Аталған іс бойынша қылмыстық іс қозғалды.
