Атырауда екі көлік соқтығысып, 6 адам аурухана жеткізілді
Облыстық полиция департаментінің баспасөз қызметінен мәлім еткендей, жол-көлік оқиғасы бүгін, 23 қазанда сағат 10:00 шамасында болған.
«Атырау қаласынан Орал бағытына қатынайтын тас жолдың 5-шақырымында екі көлік соқтығысты. 1983 жылғы жүргізуші Hyundai Sonata маркалы автокөлігімен жолдың қарсы бағытына шыққан. Соның салдарынан 22 жастағы жүргізуші басқарған Hyundai Accent автокөлігімен соқтығысып қалған. Жол-көлік оқиғасының салдарынан әртүрлі дене жарақатын алған 6 адам облыстық ауруханаға жеткізілді», - деп хабарлады департаменттің баспасөз қызметі.
Қазір полиция қызметкерлері жол-көлік оқиғасына байланысты тексеру жүргізіп, тиісті іс-құжаттарды жинақтады. Сотқа дейінгі тергеу амалдары жүргізіліп жатыр.
«Жүргізушілерге жолда жүру ережелерін сақтауды ескертеміз. Жол-көлік оқиғасы жолаушы өміріне қауіп төндіреді. Сол себептен, жолда көлік жылдамдығын шамадан тыс асырмау қажет», - деп мәлім етті департаменттің баспасөз қызметінен.
Еске сала кетелік, 21 қазанда көлік қаққан 11 жасар жасөспірім көз жұмған еді. Сол күні Атырауда жеңіл көлік автобуспен соғылып, жүргізуші мерт болды. Кейін 4 жасар баланы көлік қағып кетті. Ал, кеше жол апатынан 5 адам қаза тапты.