Атырауда ер адамды өлтірген 4 жеткіншек сотталды
Сотта анықталғандай, сотталушылар кәмелет жасына толмаған И.Т., Б.Н., Р.Т. және Л.А. 2014 жылдың қазан айында кешке кездесіп, серуендеу кезінде жасы кәмелетке толмаған И.Т., қасындағы достарына жалғыз кетіп бара жатқан адамдарға шабуыл жасап, олардың құнды заттарымен ақша қаражаттарын иемденіп алуды ұсынады, оларда бұл ұсынысқа мүлтіксіз келісе кетеді.
Кейін сотталушылар Атырау қаласы Орталық мөлтек ауданында орналасқан тұрғын үйдің қасында кетіп бара жатқан егде жастағы азаматты көріп, оның соңына түсіп аңдиды, көзден таса жерге жеткен кезде жәбірленушіге кенеттен келіп, бас салып, ұрып соғады, алған соққыдан жерге құлаған кезде, қаскөйлер оның орнынан тұруға мүмкіндік бермей, денесінің әр жерінен қолдарымен және аяқтарымен соғып,тебеді.
Дәрменсіз күйде жатырған жәбірленушіні көрген сотталушы И.Т. жерде жатырған тасты алып, басына бірнеше рет соққылар жасайды. Ол есінен танған кезде қалғандары келісім бойынша жәбірленушінің қалталарын қарап, 2 дана әмиянын және ұялы телефонын алып, оқиға болған жерден бой тасалап қашып кетеді.
Алған жарақаттардың салдарынан жәбірленуші Р. жедел жәрдем автокөлігі ішінде ес жимастан көз жұмады.
Сот үкімімен кәмелетке толмаған И.Т. Қазақстан Республикасы Қылмыстық Кодексінің 96-бабының 2-бөлігінің «з» тармағымен (кісі өлтіру), 179-бабының 2-бөлігінің «а» тармағымен (қарақшылық) кінәлі деп танылып, жазаларды ішінара қосу жолымен түпкілікі 11 жыл мерзімге бас бостандығынан айыру жазасына кесілген.
Сонымен қатар, осы сот үкімімен кәмелетке толмаған азаматтар Р.Т., Л.А., Б.Н. Қазақстан Республикасы ҚК-нің 179-бабының 2-бөлігінің «а» тармағымен кінәлі деп танылып, әрқайысысына 5 жыл мерзімге бас бостандығынан айыру жазасы тағайындалды.
Сот үкімі заңды күшіне енді, деп хабарлайды Атырау облысының қылмыстық істер жөніндегі мамандандырылған ауданаралық соты ның баспасөз қызметінен.