Атырауда есірткі тасымалдаған 30 жастағы күдікті қамауға алынды
АТЫРАУ. ҚазАқпарат – Атырауда есірткі тасымалдаған 30 жастағы күдікті қамауға алынды. Күдіктіден есірткі мен тапанша тәркіленді, деп хабарлайды ҚазАқпарат.
Облыстық полиция департаментінің баспасөз қызметінен мәлім еткендей, есірткі тасымалдаған күдікті кешен, 8 мамыр күні сағат 16:40 шамасында ұсталған.
«Есірткі қылмысына қарсы іс-қимыл басқармасының қызметкерлері Атырау қаласындағы көшелердің бірінде есірткі тасымалдаумен айналысқан 1993 жылғы тұрғынды ұстады. Күдіктіден 4 дана политилен пакетке оралған синтетикалық есірткіге ұқсас ұнтақ пен тапанша тәркіленді. Оның тұрақты мекен-жайын тінту кезінде политилен пакетке салынған ұнтақ пен ас үйінен кептірілген есірткі тектес өсімдік табылды. Тәркіленген айғақ заттарға сараптама тағайындалды», -деп хабарлады департаменттің баспасөз қызметі.
Қазір ұсталған күдіктіге қатысты ҚР Қылмыстық кодексінің 297-бабының 3 бөлігі бойынша сотқа дейінгі тергеу басталды. Күдікті уақытша ұстау изоляторына қамауға алынды.
Еске сала кетелік, бұған дейін Атырауда соңғы 2 жылда 18 мың данадан астам психотропты дәрі тәркіленгенін жазған едік.
Полицейлер 2021 жылдан бері заңсыз айналымнан 18 мыңнан астам психотропты дәрі-дәрмектерді тәркілеген. Мәселен, сол жылы 9 адам ұсталып, олардан 5 135 дана трамадол, трапикомед дәрі-дәрмектері алынған.
Ал, былтыр ұсталған 17 адамнан 7 800 дана трамадол, трапикомид, лирика дәрілері тәркіленіп отыр. Биылғы жыл басынан бері осындай құқық бұзушылық үшін 9 ұсталып олардан 3596 дана тарамадол, тропикамед, сомнол, алис дәрі-дәрмектері тәркіленді.
Атырау облысында заңсыз айналымнан 60 келіден астам есірткі тәркіленгенін хабарлаған болатынбыз.
Департамент бастығы Нұрхат Оразбаевтың мәліметінше, биылғы жыл басынан тіркелген бұл санаттағы қылмыстардың ішінде 8 дерек Тараз, Қарағанды, Ақтөбе, Семей Шығыс Қазақстан облыстарынан және Нигерия, Өзбекстан, Қырғызстан Республикаларынан келген тұлғалар тарапынан жасалып отыр. Заңсыз айналымнан жалпы салмағы 60 келіден астам есірткі тәркіленген.
