Атырауда жаяу жүргіншіні мерт қылған мас жүргізуші ұсталды
Облыстық полиция департаментінің баспасөз қызметінен мәлім еткендей, жол-көлік оқиғасы кеше, 19 желтоқсанда болған.
«Кеше, 19 желтоқсан сағат 21:50 шамасында Атырау қаласының М.Әуезов көшесінде орналасқан 52а үй тұсында жол-көлік оқиғасы болған. Жол бойында келе жатқан ер адамды көлігімен қағып құлатқан. Жүргізуші жол-көлік оқисы туралы ішкі істер органдарына хабарламай, кетіп қалған. Алған дене жарақаттарының салдарынан жаяу жүргінші оқиға орнын қаза тапқан», -деп хабарлады департаменттің баспасөз қызметі.
Аталған жол-көлік оқиғасына байланысты Атырау қалалық полиция басқармасына қарасты патрульдік полиция батальонының қызметкерлері жол-көлік оқиғасына қатысы барі көлікті іздеді.
Қаланың Стаханов көшесінде орналасқан гараждардың арасынан Mercedes Benz көлігі табылды.
Көлікті мас күйінде жүргізген 1988 жылғы жүргізуші ұсталды. Қазір күдікті қамауда.
Жол-көлік оқиғасына байланысты ҚР Қылмыстық кодексінің 345-бабының 3-бөлігімен және 347-бабымен тергеу амалдары басталды.
Қылмыстық іс Атырау қалалық полиция басқармасы №1 полиция бөлімінде тіркелді.
Еске сала кетелік, бұдан бұрын Атырау облысында 5 адам мерт болған жол апатына кінәлі жүргізуші сотталғанын хабарлаған болатынбыз.
Сот үкімімен жүргізуші С. ҚР Қылмыстық кодексі 345-бабының 4-бөлігімен кінәлі деп танылды. Сотталушы 7 жыл мерзімге көлік құралдарын басқару құқығынан, 5 жылға бас бостандығынан айырылды.
Фото: Атырау облысының Полиция департаменті