Атырауға жолаушылап бара жатқан 20 жасар жігіт суға кетіп, ажал құшты

ОРАЛ. ҚазАқпарат - Бөкей ордасы ауданының 20 жасар тұрғыны Атырауға жолаушылап бара жатып, суға батып кетті.

Апаттық медицина орталығы күрежолдық медициналық құтқару бекетінің фельдшері Нұрсейіт Құспановтың сөзіне қарағанда, аталмыш азамат 22 мамыр күні серіктерімен «КамАЗ» көлігімен Ақжайық ауданының орталығы - Чапаев ауылының тұсында «Ақ дастарқан» дәмханасына аялдайды. Тамақтанған соң ол қолындағы ыдысымен су алу үшін таяу жердегі су арнасына барады. Өкінішке қарай, күрт ылдилайтын жарда аяғы тайған болу керек, жігіт арнаға батып кеткен. Мұны жөпелдемде ешкім аңдамай қалған. Марқұмның денесі сол бойда судан шығарылды.