Ауғанстандық босқын әйелдердің өміріне қауіп төніп тұр
АСТАНА. KAZINFORM - Пәкістан билігінің шетелдік босқындарды толықтай депортациялау үшін белгілеген мерзімінің бітуіне небәрі 4 күн қалды. Билік 31 наурызға дейін құжатсыз жүрген барлық шетелдікті елден шығаруды жоспарлап отыр. Олардың басым көпшілігі - Ауғанстан азаматтары.
Euronews мәліметінше, Талибан билігі орнаған 2021 жылдан бері жарты миллионнан астам ауғанстандық Пәкістанға бас сауғалап барған. Олардің көбі АҚШ пен өзге мемлекеттерге қоныс аударуды күтіп отыр. Алайда Трамп әкімшілігі 27 қаңтардан бастап АҚШ-тың босқындарды қабылдау бағдарламасы кемінде үш айға тоқтатылатынын мәлімдеді. Сөйтіп 20 мың ауған Пәкістанда қалып қойды. Енді олар 31 наурызға дейін елден кетпесе, Ауғанстанға депортациялануы мүмкін. Халықаралық көші-қон ұйымының (IOM) деректеріне сүйенсек, 2023 жылдан бері 800 мыңнан астам ауған азаматы өз еріктерімен немесе мәжбүрлі түрде елдеріне оралған. Олардың 70%-ы - әйел мен бала.
Осыған байланысты Human Rights Watch (HRW) ұйымы Исламабадты ауған босқындарына көрсетіліп отырған қысымды тоқтатуға шақырды.
- Пәкістан билігі ауған азаматтарын елдеріне оралуға мәжбүрлеуді дереу тоқтатуы керек және депортациялану қаупінде тұрғандарға өздеріне қорғаныс іздеу мүмкіндігін беруі тиіс. Ауғанстан мәжбүрлеп қайтарылған ешбір босқынның еліне оралуы үшін қауіпсіз емес, - дейді HRW-дың Азия бойынша директоры Элейн Пирсон.
Ауғанстанға қайтарылатын босқындардың арасында елінен қашып шыққан 60 құқық қорғаушы әйел бар. Олар еліне оралған жағдайда өмірімізге қауіп төнеді деп алаңдайды. Осыдан 3 күн бұрын АҚШ-тың Change.org онлайн платформасында «60 ауған әйелін депортациядан және өлім жазасынан құтқару» атты петиция жарияланған.
- Бұл әйелдер қорғауға мұқтаж, өйткені олардың үштен екісі бұрын «Талибан» тарапынан тұтқындалып, азапталған немесе зорланған. Олар үнемі қауіп-қатерде өмір сүреді. Осы аптада ғана полиция ауған босқындары тұрып жатқан үйлерге тінту жүргізді, – делінген петиция сипаттамасында.
Еске сала кетейік, Ауғанстанда тәліптер әйелдерге радиодан хабар таратуға тыйым салғанын жазған едік.
