Ауыл әкімдеріне қандай өкілеттіктер берілмек

АСТАНА. KAZINFORM — Орталық коммуникациялар қызметіндегі брифингте Ұлттық экономика вице-министрі Бауыржан Омарбеков ауылдық округ әкімдерінің өкілеттіктерін кеңейту үшін қандай шаралар ұсынылып отырған айтты. 

Вице-министр атаған шаралар мыналар:

— әкімдерге азаматтық қызметшілердің еңбекақы төлеу жүйесі бойынша жұмысшыларды еңбек шарты негізінде жалдау құқығын беру;

— арнайы техника мен ауыл шаруашылығы машиналарын сатып алуға рұқсат беру, оларды халыққа ақылы негізде қызмет көрсету үшін пайдалану;

— әкімдер мен олардың аппараттарының өкілеттіктерін кеңейту;

— қоғамдық орындарды абаттандыру, балалар ойын алаңдарын пайдалануға бақылау жүргізу, ақылы қызметтер ұсыну және басқалары.

— Бұл жаңашылдықтар Мәжіліс депутаттарымен қосымша талқыланып, заңнамалық бастамалар аясында жүзеге асырылатын болады, — деді ол.

Сонымен қатар Бауыржан Омарбеков ауыл бюджетін арттыру үшін заңды және жеке тұлғалардың мүлік салығының бір бөлігін аудару, у ресурстарын пайдаланғаны үшін төлем, белгілі бір қызмет түрлерімен айналысу құқығы үшін лицензиялық алым, лицензиялар мен рұқсаттарды пайдаланғаны үшін төлем сынды кейбір кіріс көздерін беру жоспарланып отырғанын айтты.

Бұған дейін 97 пайыздан астам ауыл әкімдері сайлау арқылы тағайындалғанын жазған едік.