«Ауыл аманаты» және «Ауыл — Ел бесігі» жобалары біріктіріледі

АСТАНА. KAZINFORM — Биыл да 500-ге жуық ауылдық аумақтарда 176,4 млрд теңгеге 900-ден астам жоба іске асырылады. Бұл туралы Орталық коммуникациялар қызметіндегі брифингте Ұлттық экономика вице-министрі Бауыржан Омарбеков айтты.

— «Ауыл — Ел бесігі» жобасы — ауылдық аумақтардағы инфрақұрылымды дамытуға бағытталған негізгі құралдардың бірі. 2019 жылдан бастап жоба аясында ауылдардың инфрақұрылымын дамытуға 701 млрд тенге бөлініп, 2,2 мың ауылда 6,6 мыңға жуық жоба іске асырылды. Нәтижесінде 5,3 мың шақырым көлемінде инженерлік желілер, сондай-ақ 7,9 мың шақырым ауылішілік жолдар жаңғыртылды, сонымен қатар бір қатар әлеуметтік нысандар жаңадан салынды немесе қайта жаңғыртылды. Биыл да 500-ге жуық ауылдық аумақтарда 900-ден астам жобаны іске асыруға 176,4 млрд теңге бөлінді. Бұл жобалар ауылдардың инфрақұрылымын жақсартуға және тұрғындардың өмір сүру сапасын арттыруға бағытталады, — деді вице-министр.

Оның дерегінше, 2023-2024 жылдары аралығында қаржыландырудың барлық көзінен 2 трлн теңгеге жуық бюджет қаражаты бөлініп, әлеуметтік, инженерлік, көліктік инфрақұрылымды, қоғамдық және экологиялық қауіпсіздікті дамытуға бағытталды.

— Қазіргі таңда Ұлттық экономика министрлігі ауылдық аумақтарды кешенді дамытуға арналған мемлекеттік қолдау шараларын, оның ішінде «Ауыл аманаты» және «Ауыл — Ел бесігі» жобаларын бір бағдарламаға біріктіру бойынша жұмыстар жүргізіп жатыр. Бірінші — «Ауыл Аманаты» және «Ауыл — Ел бесігі» жобаларын іске асыруды басым тәртіппен даму әлеуеті бар ауылдарда жүзеге асыру ұсынылып отыр. Бұл басқа ауылдарда іске аспайды деген сөз емес. Тек қана басым бағыттар сол ауылдарға ден қойылып отырғандығы. Екінші — «Ауыл аманаты» жобасы маңызды бастама болғандықтан қаржы ресурстарын стратегиялық түрде бөлу, экономикалық негіздемені күшейту және бөлініп жатқан қаржының игерілуі бойынша мониторингті жетілдіруге қатысты шаралар қабылдау. «Ауыл аманаты» жобаларын іске асыру басым тәртіппен «Ауыл — Ел бесігі» және басқа да бағдарламалардың құралдарын пайдалана отырып, инженерлік және әлеуметтік инфрақұрылымды дамытумен синхронды түрде жүргізіледі, — деді Бауыржан Омарбеков.

Бұған дейін «Ауыл аманаты» бағдарламасы бойынша БҚО республикада көш бастап тұрғанын жазған едік.