Ауыл шаруашылығы санағының деректері салық органдарына берілмейді — Статбюро

АСТАНА. KAZINFORM — Биыл елімізде өтетін Ұлттық ауыл шаруашылығы санағы кезінде алынған мәліметтердің құпиялылығы сақталады. Бұл туралы ҚР Ұлттық статистика бюросының басшысы Мақсат Тұрлыбаев айтты.

— Ұлттық статистика бюросы алынған деректердің анонимділігіне және оларды қатаң статистикалық мақсаттарда пайдалануға кепілдік беретінін атап өткім келеді. Сандар респонденттің бастапқы деректерін көрсетпей-ақ, жиынтық түрде өңделеді және жарияланады. Деректер салық немесе басқа мемлекеттік органдарға берілмейді, — деді ол ОКҚ алаңында.

Сондай-ақ спикер шаруа қожалықтары деректер базасында өз иелігіндегі мүлік туралы деректі жаңартуға мүмкіндік барын атап өтті. 

— Сауалнама парағын толтыру кезінде респондент (ұйымдасқан шаруашылық) мемлекеттік деректер базасында деректерді жаңарту үшін алынған деректерді ұсынуға келісім бере алады, мысалы, малдың, техниканың, жер учаскесінің болуы және т. б. Туралы, — деді Ұлттық статистика бюросының басшысы.

Еске салсақ, биыл елімізде араға 18 жыл салып ауыл шаруашылығы санағы өтеді.

Бұған дейін санақ кезінде дерек беруден бас тартқандарға қандай жаза барын жазған едік.