Ауылдардың көбі үш облыста жабылған
АСТАНА. KAZINFORM – ҚР Ұлттық экономика министрлігі 2023 жылы ел өңірлерінде неше ауыл жабылғанын мәлім етті.
«Атап айтқанда, «Қазақстан Республикасының әкiмшiлiк-аумақтық құрылысы туралы» Заңына сәйкес, халқының саны 50 адамнан аз шаруа қоныстары мен өзге де қоныстар ең жақын маңдағы елді мекеннің құрамына енгiзiледi. Сонымен қатар, жергiлiктi өкiлдi және атқарушы органдар өз өкiлеттiктерi шегiнде әкiмшiлiк аумақтарды құру және тарату, олардың шекараларын белгiлеу және өзгерту, оларға ат қою мен олардың атын өзгерту туралы шешiмдер қабылдайды. Бұл тұрғыда 2023 жылы елімізде 39 ауыл қысқартылды», - делінген Ұлттық экономика министрлігінің Kazinform агенттігіне берген жауабында.
Аталған 39 ауылдың ішінде 25-і Қостанай облысына тиесілі. Мұнымен қоса Қарағанды облысында 7 ауыл, Батыс Қазақстан облысында 3 ауыл таратылған.
Бұдан бұрын хабарланғандай, кейінгі 10 жылда елімізде ауылдар саны 582-ге қысқарды.
