Ауыр қылмыс жасағандарды мерзімінен бұрын босату: өкілеттік алқабилер сотына берілмек
АСТАНА. KAZINFORM – 2025 жылдан бастап ауыр қылмыс жасағаны үшін сотталғандарды мерзімінен бұрын босату туралы арызды алқабилер соты қарайтын болады. Бұл туралы ҚР Жоғарғы сотының төрағасы Асламбек Мерғалиев айтты.
«Сот жүйесін демократияландыру және сот төрелігін жүзеге асыруға азаматтық қатысуды кеңейту мақсатында Мемлекет басшысының тапсырмасы бойынша алқабилердің қарауына жататын істердің санаттары кезең-кезеңімен кеңейтілуде (2022 жылға дейін — 14, 2023 жылы — 31, 2024 жылы — 44 құрам). Нәтижесінде алқабилердің қатысуымен қаралған істердің саны айтарлықтай өсті: егер 2021 жылы (8-ші форум өткізілген кезде) олардың саны 59 болса, 2024 жылдың 9 айында бұл көрсеткіш екі жүзге жуықтады (196)», — деді ҚР Жоғарғы сот төрағасы Орталық Азиядағы қылмыстық сот төрелігі бойынша сарапшылардың 9-форумында.
Сондай-ақ, ол ауыр қылмыстар үшін сотталғандарды мерзімінен бұрын босату туралы арызды ендігі жерде алқабилер соты қарайтынын атап өтті.
«Ауыр және аса ауыр қылмыстар үшін сотталғандарды шартты түрде мерзімінен бұрын босату және жазаны ауыстыру туралы арыздарды қарауды алқабилер сотының мандатына енгізуді де жоспарлап отырмыз. Тиісті пилоттық жоба 2025 жылы іске қосылады», — деді Асламбек Мерғалиев.
Айта кетейік, бұған дейін Орталық Азиядағы қылмыстық сот төрелігі бойынша сарапшылардың 9-форумы өтіп жатқанын жазған едік. Шара екі күнге созылады.
Онда 200 сарапшы Орталық Азияда қылмыстық сот төрелігі жүйесін дамыту мәселесін талқылап жатыр.
