Australian Open: Заңғар Нұрланұлы «Үлкен дулыға» турнирінде алғашқы жеңісіне қол жеткізді

АСТАНА. KAZINFORM - Қазақстандық теннисші Заңғар Нұрланұлы жасөспірімдер арасында Аустралия ашық чемпионатын жеңіспен бастады.

Жасөспірімдер арасында әлемдік рейтингіде 39-орында тұрған З.Нұрланұлының бұл «Үлкен дулыға» турниріндегі беташар кездесуі еді.

Қазақстандық теннисші алғашқы айналымда жасөспірімдер арасында ITF рейтингісінде 306-орында тұрған Аустралия өкілі Николас Бейкермен кездесті.

Бірінші партияда Заңғар 6:2 есебімен басым түсті.

Екіншісінде корт иесі есе қайырды - 6:3.

Үшінші, шешуші сетте Заңғар Нұрланұлы жеңісті жұлып алды - 6:3.

Тартысты матч 2 сағат 7 минутқа созылды.

З.Нұрланұлы спорттық жолында аустралиялық ойыншылардан ұтылып көрген емес.

Жасөспірімдер арасында Қазақстаннан сондай-ақ Әмір Омарханов бақ сынайды.

Еске сала кетейік, бұдан бұрын Аустралия чемпионатында Әмір Омарханов пен Заңғар Нұрланұлының қарсыластары анықталғанын жазған болатынбыз.