Аустралияда түрмедегі адамдар саны рекордтық деңгейге жетті

АСТАНА. KAZINFORM — Ресми деректерге сәйкес Аустралия түрмелеріндегі тұтқындар саны тарихи рекорд орнатқан және бұл көрсеткіш әлі де өсіп келе жатыр, деп хабарлайды АЗЕРТАДЖ.

ABC News телеарнасының мәліметінше, қазір қамауда отырғандардың дерлік жартысы — соттың түпкілікті үкімі шығарылмаған адамдар.

Соңғы жылдары Аустралияның барлық штатында кепілмен босату жүйесіне өзгерістер енгізіліп жатыр және бұл реформалар әсіресе жас құқықбұзушыларға қатысты талаптарды күшейтуге бағытталған.

Аустралиялық статистика бюросының жуырда жарияланған деректеріне сәйкес, соңғы үш жылда түрмедегі адамдар саны тұрақты түрде өсіп келеді:

• 2022 жылғы наурызда — 40 330 адам,

• Қазір — 46 081 адам.

Сот үкімі шықпай тұрып қамауда отырғандар саны соңғы тоқсанда 1 345 адамға (8%) артып, жалпы саны 19 119 адамға жеткен.

Қамауға алынғандар саны әр 100 мың ересекке шаққанда 214 адамға жетеді, олардың 92 пайызы — ер азаматтар.

Ең жоғары қамау деңгейі аустралиялық байырғы халық өкілдері арасында тіркелді: әр 100 мың байырғы ересек тұрғынға 2 559 тұтқыннан келеді. Бұл жалпы түрме контингентінің 37%-ын құрайды.

World Prison Brief ұйымының дерегінше, G20 елдерінің арасында Аустралия тұтқындау көрсеткіші бойынша жетінші орында тұр.

Бұдан бұрын хабарланғандай, Түркия түрмелерінде адам саны шекті деңгейден асып кетті.