Ауыл шаруашылығын алға бастыру үшін үлкен мүмкіндік беріліп отыр - Б.Имашев, БҚО

ОРАЛ. 14 ақпан. ҚазАқпарат /Елжан Ералы/ - Елбасы биылғы Жолдауында ауыл шаруашылығын дамытуға айрықша көңіл бөлді. Әсіресе, етті мал шаруашылығын дамытып, ет экспортын 60 мың тоннаға дейін жеткізу міндетін қойды.

Былайша айтқанда, ауылды дамытуға үлкен мүмкіндік беріліп отыр. Бұл туралы Тасқала ауданы Оян ауылдық округінің әкімі Бауыржан Имашев мәлім етті.

Оның пікірінше, асыл тұқымды мал басын көбейтпейінше, іс алға басады деу қиын. Қазіргі кезде ауыл шаруашылығын қаржылай қолдау қоры арқылы 7 жылға 6 пайыздық мөлшерлемемен несиелер беріле бастады. Осыны тиімді де өнімді пайдалану керек. «Жаңа техникаларды лизингке алып, бос жерлерге мал қыстақтарын салып, шаруашылық құру, оларды мүмкіндігіне қарай ірілендіру ойластырылады. Бұл жаңа жұмыс орындарын ашып, ауылдың әлеуметтік-экономикалық дамуын жеделдететін болады», - деді Б.Имашев.