Автотұрақ ақысын төлеуден жалтарғандарға айыппұлды алып тастау туралы петиция жарияланды
АСТАНА. KAZINFORM – Қазақстандықтар автотұрақ ақысын төлемегені үшін салынатын айыппұлға қарсы. Оған қатысты петиция Epetition.kz сайтында 27 тамызға дейін қолжетімді.
«Автотұрақ ақысын төлеудің қолданыстағы тетігі халық арасында қиындықтар мен түсініспеушіліктер туғызады. Ең қиыны автотұрақ ақысын сол сәтте (төлем Kaspi арқылы жүргізілсе) немесе сол күні сағат 23:59-ға дейін (төлем қосымша арқылы жасалса) төлеу керек. Уақтылы төлемеген жағдайда әкімшілік айыппұл салынады, оның сомасы автотұрақ ақысынан едәуір жоғары. Айта кететін жайт, көлік иелері автотұрақ ақысын төлеуден қашпайды, олар үлгермейді, ұмытып кетеді немесе автотұрақтың ақылы екенін білмейді», - делінген петиция мәтінінде.
Петиция авторларының айтуынша, қазір қалаларда тегін автотұрақтар қалмаған.
«Ауруханалардың, мектептердің, балабақшалардың және сауда орталықтарының автотұрақтары ақылы, бұл көлік иелері үшін қосымша қиындық. Астана қаласы әкімдігіне автотұрақтардың ақысын төлеу тетігін қайта қарау туралы ұсынысымыз жөніне қалды. Сонымен қатар ақылы жолдар (ҚазАвтоЖол) бойынша алдын ала төлеуді, сондай-ақ төлемге шот қоюды және төлем жасалмаған жағдайда хабарламалар жіберуді көздейтін тетіктер ұсындық. Бұл тәсіл жол ақысына қатысты жанжалдарды азайтып, қала тұрғындары үшін қолайлы жағдай жасай отырып, тұрақ ақысын төлеудің икемді және ыңғайлы әдісін қамтамасыз етеді. Сол сияқты автотұрақ ақысын төлеу механизміне көшу қаладағы тұрақ кеңістігін тиімді пайдалануға ықпал ете отырып, жүйені азаматтар үшін ашық, әділ және түсінікті етеді. Ұсынылған идея перспективалы болып көрінеді және оны іске асыру қала тұрғындары арасындағы әлеуметтік шиеленісті төмендетуге әлеуеті бар», - дейді петиция авторлары.
Бүгінде елорда әкімдігінің жергілікті бюджетіне автотұрақтардан келетін түсімдер сомасы 5 млрд теңгеден асады екен.
«Алайда, бұл қаражаттың қалай пайдаланылатыны қала тұрғындары үшін түсініксіз. Ақылы автотұрақ иелері өз мүддесін ғана қорғайды, бұл халықтың есебінен негізсіз баюға әкеледі. Бұл мәселенің жалғыз шешімі «Әкімшілік құқық бұзушылық туралы» ҚР Кодексінің 597-бабының 4-1 және 4-2-тармақтарын алып тастау. Атап айтқанда, республикалық маңызы бар қалалардың және елорданың жергілікті атқарушы органдары айқындаған көлік құралдарын тұраққа қою үшін ақы алуға және тұраққа қою уақытын есепке алуға арналған арнайы сертификатталған құрылғылармен жабдықталған орындарда тұрақ үшін ақы төлеуден жалтару үш айлық есептік көрсеткіш мөлшерінде айыппұл салуға әкеп соғады. Осы баптың 4-1-бөлігінде көзделген, әкімшілік жаза қолданылғаннан кейін бір жыл ішінде қайталап жасалған іс-әрекет бес айлық есептік көрсеткіш мөлшерінде айыппұлға әкеледі. Бұл талаптарды алып тастау қала тұрғындарының мүдделеріне сәйкес келетін және қалалық тұрақ кеңістігін тиімді пайдалануға ықпал ететін тұрақ ақысын төлеудің неғұрлым әділ және ашық жүйесін құруға мүмкіндік береді», - деп толықтырылған.
Бүгінде ӘҚБтК-нің 597-бабының 4-1 және 4-2-бөліктерін алып тастау жөніндегі түзетулерді көздейтін «Қазақстан Республикасының Әкімшілік құқық бұзушылық туралы кодексіне өзгерістер мен толықтырулар енгізу туралы» ҚР Заңының жобасы Мәжілістің қарауында.
