Автожол саласында қызметкерлердің кәсіби дамуы үшін жаңа ережелер енгізілді

АСТАНА. KAZINFORM — Жол инфрақұрылымының сапасы мен қауіпсіздігін арттыру мақсатында автожол саласы қызметкерлерінің біліктілігін міндетті түрде арттыру қағидалары ресми түрде бекітілді.

Көлік министрлігі таратқан ақпаратқа сәйкес жаңа талаптар бойынша мамандар кемінде үш жылда бір рет ұзақтығы 40 академиялық сағаттан кем емес курстардан өтуі тиіс. 

— Ал жол ұйымдарының басшылары қызметке тағайындалғаннан кейін алты ай ішінде оқытудан өтеді. Бағдарламалар тәжірибеге негізделіп, дәрістерді, семинарларды, тренингтерді және тағылымдамаларды қамтиды. Оқытуға отандық және шетелдік сарапшылар тартылады, — делінген министрлік хабарламасында.

Курсты аяқтағандар қорытынды бағалаудан өтіп, үш жылға жарамды сертификат алады. Бұл — мамандардың кәсібилігін арттыруға және заманауи технологияларды енгізуге бағытталған.

Бұдан бұрын 15 қыркүйектен бастап республикалық маңызы бар ақылы автожолдарда төлем ережелері өзгергенін жаздық.