Айбек Оралбай қарсыласын жеңіп, Олимпиада лицензиясына бір табан жақындады

БУСТО-АРСИЦИО. KAZINFORM — Италияның Бусто-Арсицио қаласында өтіп жатқан лицензиялық турнирдің 1/8 финалында қазақстандық боксшы Айбек Оралбай сенімді жеңіске жетті. 

Ол Эквадордан келген Хулио Сесар Кастильо Торрестен басым түсті. 

35 жастағы эквадорлық Хулио Кастильо — 2019 жылғы әлем чемпионатының күміс жүлдегері. Үш Олимпиадаға қатысқан.

Айбек Оралбай қарсыласының мықты тұстарына күшті тойтарыс беріп, рингте сауатты әрекет етті. Есеп 5:0 болды. 

Төрешілердің бірауыздан шешімімен қазақстандық боксшы жеңіске жетті.

Осылайша, Айбек 1/4 финалға жолдама алып, лицензияға бір табан жақындады.

Париж Олимпиадасына жолдама алу үшін Айбек Оралбай енді америкалық Джамар Таллиді жеңуге тиіс.

23 жастағы Айбек Оралбай — Азия чемпионы, сондай-ақ Жасөспірімдер олимпиадасында жеңіске жетіп, әлем чемпионатының финалына дейін жеткен.