Әйелге – жетон, күйеуіне – электронды білезік: Қырғызстан отбасындағы зомбылықпен қалай күреспек

Қырғызстан Республикасының Әділет министрлігі Жогорку Кенеш қарауына тергеудегі күдіктілерге электронды білезік тағуды қарастыратын заң жобасын ұсынды. Бұл туралы әйелдерге қатысты зорлық-зомбылықтың алдын алу мәселелері жөніндегі кеңес барысында Әділет министрі Аяз Баетов мәлім етті. Kazinform бұл туралы Кабар ақпарат агенттігіне сілтеме жасап хабарлайды.

Оның айтуынша, бұл технология үйқамаққа алу режимін бұзу жағдайларының санын азайтуға, сондай-ақ құқық қорғау органдарының тиімділігін арттыруға септігін тигізеді.

Министр атап өткендей, білезіктер сондай-ақ, отбасындағы зорлық-зомбылық мәселесін шешуде тиімділігін көрсететін болады.

«Отбасында зардап шеккен адамға қорғау ордерінің орнына –арнайы жетон, ал зорлық-зомбылық жасаушыға электронды білезік беріледі. Зорлықшы зардап шеккен адамға 1 шақырымнан аз қашықтықта жақындаған кезде дабыл белгісі іске қосылады. Бұл жағдайда дабыл белгісі тек жетонға емес, құқық қорғау органдарына да түседі», — деп түсіндірді Баетов.

Ведомство басшысының атап өтуінше, қазіргі уақытта министрлік электронды білезіктерді енгізуге толық дайын, бірақ Жогорку Кенеш заң жобасын әлі қарастырған жоқ.