Айға ұшып бара жатқан астронавтар Жердің таңғажайып суретін түсіріп алды
АСТАНА. KAZINFORM – NASA Айды айналып ұшу кезінде «Артемида II» миссиясының экипажы түсірген Жердің жоғары ажыратымдылықтағы алғашқы суреттерін жариялады, деп хабарлайды ВВС.
NASA-ның мәліметінше, миссия командирі Рид Уайзман экипаж Жердің көктегі ең жақын көршісі – Айға бағыт алған траекторияға шығару үшін қозғалтқышты соңғы рет іске қосу маневрін аяқтағаннан кейін осы «таңғажайып» суреттерді түсірген.
«Сәлем, әлем» деп аталған алғашқы суретте Атлант мұхитының шексіз көгілдір айдыны көрінеді. Ол Жерді Күн тұтқан сәттегі атмосфераның жіңішке жарқылымен және екі полюстегі жасыл полярлық шұғыламен көмкерілген.
Кадрда Жер төңкеріліп тұрғандай әсер қалдырады: сол жақта Сахараның батыс бөлігі мен Иберия түбегі, ал оң жақта Оңтүстік Американың шығыс бөлігі көрінеді.
NASA суреттің төменгі оң жақ бұрышындағы жарық планетаны Шолпан деп таныды.
Суреттер экипаж жұма күні таңертең Ай орбитасына бағыттайтын тарту күшін қайта бағдарлау маневрін сәтті аяқтағаннан кейін түсірілген.
Қозғалтқышты іске қосу нәтижесінде Orion ғарыш кемесі Жер орбитасынан шығып, оның бортындағы төрт ғарышкер Айға дейінгі 200 мың мильден астам қашықтықты еңсеруге тиіс.
Қазіргі уақытта ғарыш аппараты экипажға Айдың арғы бетін айналып өтіп, қайта оралуға мүмкіндік беретін тұйық траекториямен қозғалып келеді. Бұл – 1972 жылдан бері алғаш рет адамның Жер орбитасынан тыс ұшуы.
Экипаж Айдың арғы бетін 6 сәуірде айналып өтіп, 10 сәуірде Жерге оралуы тиіс.
Маневр аяқталғаннан кейін экипаж мүшелері Жер-ананы суретке түсіру үшін «терезелерге жабысып қалғанын» миссия маманы Джереми Хансен Хьюстондағы ұшуды басқару орталығына хабарлады.
– Біз Ай сәулесіне шомған Жердің қараңғы бөлігін көруге тамаша мүмкіндік алып отырмыз, – деді ол.
Кейінірек Уайзман Хьюстондағы басқару орталығына хабарласып, ғарыш кеңістігін көруге асыққан астронавтардың терезені саусақ іздерімен былғап алғанын айтып, оны қалай тазалау керегін сұраған.
Командир бастапқыда Жерді мұндай қашықтықтан түсіру қиын болғанын, себебі экспозиция параметрлерін дәл баптау оңайға соқпағанын айтты.
– Бұл үйіңнің ауласына шығып, Айды суретке түсіруге тырысқанмен бірдей. Қазір мен дәл сондай сезімдемін, – деді ол басқару орталығына.
Алайда қазір бұл мәселе шешілген.
Уайзман түсірген тағы бір суретте Жер күндіз мен түнге бөлініп көрінеді. Жарық пен қараңғылықтың осы шекарасы терминатор деп аталады.
Кейін NASA Жердің түнгі қараңғылыққа батып, адамзаттың электр шамдары жылтылдап тұрған тағы бір суретін жариялады.
Сондай-ақ NASA 2026 жылғы Жер суретін 1972 жылы «Apollo 17» экипажы түсірген ұқсас кадрмен салыстырды. Бұл – адамдардың Айға соңғы рет аяқ басқан кезеңі.
– Соңғы 54 жылда біз ұзақ жолдан өттік, бірақ бір нәрсе өзгерген жоқ: біздің үйіміз ғарыштан керемет көрінеді! – делінген хабарламада.
Еске сала кетейік, 2 сәуір күні NASA Orion ғарыш кемесін Айға ұшырды. Одан кейін
«Артемида-2» миссиясының экипажы мінген кеме Жер орбитасынан шығып, Айға бет алғанын жаздық.
