Азаматтардың қауіпсіздігін қамтамасыз ететін цифрлық сервистер енгізіліп жатыр
АСТАНА. KAZINFORM — Қазақстанда шұғыл қызметтердің жұмысын жеңілдететін және азаматтардың қауіпсіздігін қамтамасыз ететін цифрлық сервистер енгізіліп жатыр. Бұл туралы Үкіметтің баспасөз қызметі хабарлады.
Yandex Qazaqstan бас директоры Тимур Шалекенов Премьер-министрдің тапсырмаларын орындау шеңберінде платформалық жұмыспен қамту бойынша бастамалар іске асырылып жатқанын атап өтті. Енді Yandex өз жүргізушілері мен курьерлері үшін салық агенті болып саналады. Бұл платформа қатысушыларының міндетті әлеуметтік медициналық сақтандыруға (МӘМС) және зейнетақы аударымдарына қол жеткізуіне, олардың әлеуметтік қорғалуын күшейтуге мүмкіндік береді.
Сонымен қатар, Yandex азаматтардың жайлылығы мен қауіпсіздігін арттыруға бағытталған цифрлық сервистерді де дамытуды жалғастырып жатыр.
Тимур Шалекенов цифрлық шешімдерді мемлекеттің сұраныстарымен және қазақстандықтардың қажеттіліктерімен үндестірудің маңыздылығын атап өтті. Осындай жобалардың бірі — қосымшаларда жедел жәрдем көлігінің қозғалысын бақылау функциясының іске қосылғаны, бұл шұғыл қызметтердің call-орталықтарына жүктемені азайтуға мүмкіндік береді.
— Біз қазір әрбір қазақстандыққа күнделікті өмірін жақсартуға көмектесетін бірқатар бастаманы жүзеге асырып жатырмыз. Мысалы, мамыр айынан бастап Яндекс қосымшаларында жедел жәрдем көлігінің қозғалысын бақылау тетігін іске қостық. Бұл жедел жәрдем қызметінің байланыс орталықтарына жүгіну санын азайтуға мүмкіндік берді. Қазір адамдар онлайн режимде жедел жәрдем көлігінің қай жерде екенін көре алады. Бұл әрбір қазақстандықтың өмірін жақсартуға қосылған қарапайым болса да өте маңызды үлес, — деп атап өтті ол.
Сонымен қатар, компания контенттерді жергілікті жерде орналастыру аясын кеңейтіп жатыр. Енді пайдаланушылар «Yandex.Браузерде» сегіз тілден автоматты түрде қазақ тіліне аударылған бейнелерді көре алады.
Сондай-ақ, мемлекеттік қызметшілер үшін жасанды интеллект технологиясын зерделеуге арналған оқыту курсы іске қосылды. Көлік қауіпсіздігіне ерекше назар аударылып жатыр. Қазіргі уақытта Yandex Көлік министрлігімен біріге отырып қалааралық маршруттарда бірыңғай сапа және қауіпсіздік стандарттарын құру бойынша жұмыс істеліп жатыр.
Айта кетелік Қазақстан мен Яндекс ынтымақтастығы аясында жаңа жобалар іске қосылатыны туралы жазған едік.
