Азаматтық авиация академиясына ерекше мәртебе берілмек

АСТАНА. KAZINFORM — Биыл жыл соңына дейін «Азаматтық авиация академиясы» акционерлік қоғамына ерекше мәртебе беріледі.

Бұл туралы Сенат депутаттарының сауалына Премьер-министр Олжас Бектеновтің жауабында айтылған.

— Көлік министрлігі мүдделі мемлекеттік органдармен бірлесіп әзірлеп жатқан академияны дамыту жөніндегі жол картасының аясында осы жылдың соңына дейін оған ерекше мәртебе беру іс-шарасы көзделген. Бұдан басқа, жол картасында авиациялық зерттеулер ғылыми-зерттеу институты мен пилотсыз авиация орталығын құру, жасанды интеллектті қолдана отырып, саланы цифрландыру, ұшу мектебін қажетті инфрақұрылыммен қамтамасыз ету жөніндегі іс-шаралар және тағы басқалары енгізілген, — деді Үкімет басшысы жауабында.

Оның дерегінше, академияның профессор-оқытушылар құрамы — 126 қызметкер, олардың 38-інің ғылыми дәрежесі бар және 6-уы авиация саласында қызмет етіп жүрген мамандар. Оқытуды тәжірибелі мамандар — Boeing-767/757, Airbus-319/320/321 әуе кемелерінің ұшқыштары мен командирлері жүргізеді. Олардың жалпы ұшу уақыты 15 мың сағаттан асады. Сонымен қатар, академияда жыл сайын шетелдік ғалымдар дәріс оқып, бірлескен ғылыми-әдістемелік жұмыстарға тартылатын тәжірибе алмасу бағдарламалары жұмыс істейді.

— Сондай-ақ академияның білім беру стратегиясы аясында халықаралық авиациялық орталықтарда оқытуды ұйымдастыру арқылы оқытушылар тұрақты негізде біліктілігін арттырады. Мұнан бөлек, елдің негізгі авиакәсіпорындары («Air Astana» АҚ, «SCAT» АҚ және «Қазаэронавигация» РМК) меншікті қаражаты есебінен тұрақты түрде кадрларды қайта даярлауды (шетелде мамандар оқыту) жүргізеді, — деді Премьер-Министр.

Бұған дейін елімізде азаматтық авиацияны дамыту стратегиясы қашан құрылатыны айтылды.