Азат Ізбасаров БҚО сотының төрағасы қызметіне тағайындалды

ОРАЛ. KAZINFORM – ҚР Президентінің 2025 жылғы 13 наурыздағы Жарлығына сәйкес Азат Ізбасаров Батыс Қазақстан облыстық сотының төрағасы болып тағайындалды. 

Бүгін Жоғарғы соттың азаматтық істер жөніндегі сот алқасының төрағасы Нұрсерік Шәріпов Батыс Қазақстан облысының сот корпусына жаңа төрағаны таныстырды. 

БҚО сотының баспасөз қызметінен мәлім еткеніндей, іс-шараға өңір басшысы Нариман Төреғалиев, облыстың құқық қорғау және мемлекеттік органдарының бірінші басшылары, судьялар қатысты.

Нұрсерік Шәріпов жаңадан тағайындалған төрағаның сот төрелігін жүзеге асыру сапасы мен сот беделін нығайту жолындағы көп жылғы қажырлы еңбегін атап өтіп, қызметіне сәттілік тіледі.
Азат Өмірбекұлы 1978 жылы Алматы облысы Текелі қаласында дүниеге келген. 1999 жылы

Қазақ мемлекеттік заң университетін бітірген. Жалпы еңбек өтілі – 25 жыл.

1999-2004 жылдары – Талдықорған қаласы ішкі істер органдарының тергеушісі.

2004-2007 жылдары – Алматы қаласының ішкі істер органдарында тергеуші.

2007-2008 жылдары – Алматы қаласы ішкі істер органдарында тергеуші, бөлім бастығының орынбасары.

2008-2009 жылдары – Алматы қаласы ішкі істер органдарында тергеу басқармасының бастығы.

2009-2014 жылдары – Қаскелең қаласы Қарасай аудандық сотының судьясы.

2014-2018 жылдары – Маңғыстау облысы қылмыстық істер жөніндегі мамандандырылған ауданаралық сотының төрағасы.

2018-2021 жылдары – Маңғыстау облыстық сотының судьясы.

2021 жылдан бастап қазіргі кезге дейін Батыс Қазақстан облыстық сотының қылмыстық істер жөніндегі сот алқасының төрағасы қызметін атқарды.

Еске сала кетейік, бұдан бұрын СҚО сотының төрағасы болып Серікжан Ғабдулин тағайындалғанын жазған едік.