Әзербайжан аумағына Иранның ұшу аппараты құлады

АСТАНА.KAZINFORM - Әзербайжанның Нахчыван автономиялық республикасында пилотсыз ұшу аппараттары (ПҰА) апатқа ұшырады. Алдын ала мәлімет бойынша, олар Иран қарулы күштеріне тиесілі, деп хабарлайды Kazinform агенттігінің Бакудегі тілшісі.

БАҚ хабарламаларына сәйкес, оқиға Нахчыван халықаралық әуежайы мен оған жақын орналасқан ауылдардың маңында болған. Дрондардың бірі Нахчыван халықаралық әуежайының терминал ғимаратына, ал екіншісі Шекерабад ауылындағы мектептің маңына құлаған.

Оқиға салдарынан екі бейбіт тұрғын жарақат алды. Құтқару қызметтері мен өрт сөндірушілер оқиға орнына дереу жетті, залалды бағалау және тазалау жұмыстары жүргізіліп жатыр.

Оқиғаға жауап ретінде Әзербайжан Сыртқы істер министрлігі дрон шабуылын қатаң айыптайтын ресми мәлімдеме жасады.

- Біз Иран аумағынан жасалған, әуежай ғимаратына зақым келтірген және екі бейбіт тұрғынның жарақат алған бұл дрон шабуылдарын қатаң айыптаймыз. Әзербайжан аумағына жасалған бұл шабуыл халықаралық құқық нормалары мен қағидаттарына қайшы келеді және аймақтағы шиеленісті ушықтырады, - делінген Сыртқы істер министрлігінің мәлімдемесінде.

Әзербайжан Сыртқы істер министрлігі Баку Иран тарапынан оқиғаны тез арада анықтауды, тиісті түсініктеме беруді және болашақта мұндай оқиғалардың қайталануына жол бермеу үшін дереу шаралар қабылдауды талап ететінін атап өтті.

Әзербайжан сонымен қатар тиісті жауап шараларын қабылдау құқығын өзінде қалдыратынын мәлімдеді.

Дипломатиялық жауап ретінде Иранның Әзербайжандағы Төтенше және өкілетті елшісі Моджтаба Демирчилу Сыртқы істер министрлігіне шақырылып, онда наразылық білдіріліп, оған тиісті нота тапсырылды.

Бірқатар Әзербайжан БАҚ-тарының хабарлауынша, шабуыл бастапқыда болжанғандай «Шахед» сериялы дрондармен емес, айтарлықтай қашықтыққа ұшатын «Араш-2» шабуылдаушы ұшақтарымен жасалған болуы мүмкін.

Оқиға аймақтағы жалпы шиеленіс пен Таяу Шығыстағы шиеленісудің жалғасуы аясында болды. Әзербайжан билігі жағдайдың бақылауда екенін және оқиғаның барлық мән-жайын тиісті органдар мұқият тексеріп жатқанын атап өтті.

Бұған дейін Иран президентінің достас және көршілес елдерге үндеу жасағанын хабарлаған едік.