Әзербайжан «Ереван диалогінен» кейін Арменияны сынға алды

АСТАНА. KAZINFORM — Әзербайжан 26 мамырда өткен «Ереван диалогі» конференциясында Армения премьер-министрінің сөйлеген сөзінен кейін оны қатаң сынғ алды, деп хабарлады Kazinform агенттігінің меншікті тілшісі Әзербайжанның Сыртқы істер министрлігіне сілтеме жасап.

Министрлік өкілі Айхан Гаджизаденің пікірінше, Арменияның ұстанымы – конституцияны өзгертуден және аумақтық талаптардан бас тартуға құлықсыздықты білдіреді, бұл бейбітшілікке дайын екеніне күмән тудырады.

Баку сонымен қатар ЕҚЫҰ Минск тобын ескірген механизм деп атап, оны тарату қажет екенін алға тартты. Әзербайжан ел арасындағы қақтығыстың өз аумақтарын ұзақ уақыт бойғы оккупациядан азат ету арқылы аяқталғанын мәлімдейді. Арменияның «Батыс Әзербайжан» жөніндегі мәлімдемелерін Баку фактілерді бұрмалау және бұрын осы өңірде өмір сүрген этникалық әзербайжандардың құқықтарын қорғауға үндеу деп бағалап отыр.

— Әзербайжан өңірлік ынтымақтастық пен экономикалық ықпалдастықты алға жылжыту үшін кедергісіз транзитке қолдау білдіретінін растады, — делінген мәлімдемеде.

Пресс-хатшы Арменияны конституциялық өзгерістер енгізіп, аумақтық талаптардан бас тартуға және Минск тобын ешқандай шартсыз таратуға шақырды.

Бұған дейін, сәуір айында, Армения премьер-министрі Никол Пашинян Әзербайжанға бейбіт келісім мен ЕҚЫҰ Минск тобын тарату туралы бірлескен мәлімдемеге бір уақытта қол қоюды ұсынған еді.

Наурыз айында Баку мен Ереван бейбіт келісім мәтіні бойынша келіссөздерді аяқтағаны хабарланған.

Осы айда Әзербайжан Қорғаныс министрлігі Армения Қарулы күштерінің барлау ұшуларының жолы кесілгенін мәлімдеді.

Еске сала кетейік, бұған дейін Никол Пашинян Әзербайжанмен бейбіт келісімге қол қоюға дайын екенін мәлімдегенін жазған едік.