Әзербайжан НАТО-ның Озық тәжірибе орталығына қосылды
АСТАНА. KAZINFORM – Техникалық келісім елдің аталған орталықтың теңіз қауіпсіздігі саласындағы қызметіне (MARSEC COE) қосылуын қарастырады, деп хабарлайды Kazinform агенттігінің меншікті тілшісі.
- Әзербайжанның Теңіздегі қауіпсіздікті жетілдіру саласындағы Озық тәжірибе орталығын (DGMM/MARSEC COE) құруға қатысуын көздейтін техникалық регламентке НАТО-ның одақтас Трансформациялау қолбасшылығы Түркия, Португалия, Румыния және Грекия өкілдерінің қатысуымен қол қойды, - делінген Түркия қорғаныс министрлігі таратқан мәлімдемеде.
Ведомствода атап өткендей, келісімге сәйкес әзербайжандық қызметкерлер MARSEC COE-де тұрақты негізде жұмыс істей бастайды. Қатысушы елдер туларының арасында Әзербайжанның туы да ортада көтеріледі.
Әзербайжанның НАТО-мен ынтымақтастығы 1992 жылы ел Солтүстікатлантикалық Ынтымақтастық Кеңесінің консультативтік форумына қосылған кезден басталды. Қазіргі уақытта альянспен әріптестік әскери білім, қоршаған ортаны қорғау, ғылым және инновация салаларында, сондай-ақ «Бейбітшілік үшін серіктестік», «НАТО-ның операциялық мүмкіндіктері тұжырымдамасы» және т.б. түрлі бағдарламалар аясында жүзеге асырылып отыр.
Өткен жылдың қазан айында Бакуде энергетикалық қауіпсіздік пен климаттың өзгеруі мәселелерін зерттеуге арналған дөңгелек үстел өтті.
Форум Әзербайжанның НАТО-ның «Бейбітшілік үшін әріптестік» құрылымдық құжатына қосылуының 30 жылдығы аясында ұйымдастырылды. Бұған дейін наурыз айында Бакуге сапары барысында НАТО Бас хатшысы Й.Столтенберг әріптестік одан әрі нығая түседі деп күтетінін мәлімдеген.
Айта кетейік, Әзербайжан Ресей азаматтарының елге кіру ережелерін қатаңдатпақ.
