Азия ойындары: Семсерлесуден екінші «қола» бұйырды

Қытайдың Ханчжоу қаласында өтіп жатқан Азия ойындарында Семсерлесуден ерлер құрамасы қола медальге ие болды. ҚазАқпарат бұл туралы Туризм және спорт министрлігіне сілтеме жасап хабарлайды.

Құрамында Артем Саркисян, Мұхамедәлі Рахманәли, Назарбай Саттархан және Жанат Нәбиев бар семсерлесуден ерлер құрамасы командалық бәсекеде өнер көрсетті. Олар жартылай финалда әлем үздіктерінің бірі саналатын Оңтүстік Кореямен кездесіп, нәтижесінде 41:45 есебімен жол берді. Солай, Азия ойындарының қола жүлдегері атанды.

1/8 финал.
Қазақстан - Непал, 45:15

1/4 финал.
Қазақстан - Кувейт, 45:43

1/2 финал.
Қазақстан - Оңтүстік Корея, 41:45

Әзірге Қазақстан құрамасы семсерлесуден 2 қола жүлде жеңіп алды.