Азия ойындары: Қазақстандық волейболшылардың қарсыластары анықталды
Қытайдың Ханчжоу қаласында өтетін XIX жазғы Азия ойындарына қатысатын волейболдан Қазақстан ерлер және әйелдер құрамаларының қарсыластары белгілі болды, деп хабарлайды ҚазАқпарат тілшісі.
Дүбірлі дода 23 қыркүйек пен 8 қазан аралығында өтеді.
Азия ойындарынде ерлер арасында волейболдан 19 құрама қатысады. Қазақстандық волейболшылар А тобында сынға түседі. Қарсыластары - Қытай мен Қырғызстан.
2018 жылы Индонезия астанасы Джакартада болған Азия ойындарында еліміздің ерлер құрамасы жалпы есепте 17-орынды місе тұтты.
Ал еліміздің әйелдер құрамасы жеребе бойынша D тобында Жапония, Гонконг пен Ауғанстанмен шеберлік байқасады.
2018 жылы Қазақстан әйелдер құрамасы жалпы есепте 5-орынға тұрақтады.
Еске салсақ, бұдан бұрын Азия ойындарында Париж Олимпиадасына қай спорт түрінен жолдама берілетіні белгілі болды.
