Азия ойындарында қазақстандық хоккейшілер Таиланд командасынан жеңіліп қалды
НҰР-СҰЛТАН. ҚазАқпарат - Көгалдағы хоккейден Қазақстан құрамасы Азия ойындарының іріктеу кезеңіндегі алғашқы ойынын өткізді, деп хабарлайды ҚазАқпарат тілшісі.
Қазақстандық хоккейшілер алғашқы кездесуде Таиландпен кездесті. Ойын барысында олар қарсыласына 1:2 есебімен есе жіберді.
Еске салсақ, ұлттық құрама А тобында Оман, Таиланд, Гонконг және Өзбекстанмен шеберлік байқасады.
Енді олар 7 мамырда Оманмен, 9 мамырда Өзбекстанмен ойнайды. Ал 10 мамырда Гонконг құрамасымен кездеседі.
Аталған топтағы тағы бір кездесуде Өзбекстан Гонконгтен 4:2 есебімен басым түсті.
В тобында Бангладеш, Шри-Ланка, Индонезия және Сингапур құрамалары ойнайды.
Қазақстандық хоккейшілер аталған доданың финалдық кезеңінде екі мәрте бақ сынады. 1994 жылы 6-орын алса, 2018 жылы 11-орынды місе тұтты.
